Қазақстанның халық әртісі Димаш Құдайберген жаңа DIMENSIONS әлемдік турын бастады. Гастрольдің алғашқы қаласы Краков болды — салтанатты концерт Tauron Arena аренасында өтті, деп хабарлайды infohub.kz сайты.
18 қазақстандық әншінің мыңдаған жанкүйері әртүрлі елдерден келіп, сүйікті әртісін қайта көруге және тыңдауға жиналды. Димаш концертті ана тілінде — қазақша ашты. Сол кеште «Ақерке», «Тау ішінде», «Дурдараз», «Самғау», «Ұмытылмас күн» және тағы басқа да көптеген әндер шырқалды.
Әртіс әлемдік тур үшін көптеген жаңа ән дайындады, олардың көбі — өзінің авторлық туындылары. Шоудың бірінші бөлімінде ағылшын тіліндегі екі премьера — «Guilty of Your Light» және «Somebody Loves You» орындалды. Бұл бөлім маэстро Крутойдың «Olimpico» кантатасымен аяқталды.
Екінші блок «Fire» әнімен ашылды, содан кейін Димаш төрт жаңа композициясын ұсынды — ағылшын тіліндегі «Drive On» мен «Tell Me Why», шебер вокализ және інісі Мансұр Құдайберген жазған «Release my soul».
Жанкүйерлер Димашқа поляк тілінде «Мен сендерді жақсы көремін» деген сөзді айтуды үйретті, кейін ол оны залмен бірге қуана шырқады. Молдовадан келген жас жанкүйер Тимурдың қолындағы жарқын баннерді көрген әнші оны сахнаға шақырды, олар бірге «Любовь уставших лебедей» және «S.O.S» әндерінің үзінділерін орындады.
Шоудың үшінші бөлімінде экранда «Өмір» әнімен кішкентай Димаш пайда болды, жас әртіске ересек Димаштың дауысы қосылды. Көрермендерді Темірлан Олжабай мен Ернат Наурыздың домбырадағы солосы да қуантты. Содан кейін Димаш «The Story of One Sky» әнімен бейбітшілікке шақырып, сахнаға қайта оралды. Қобызшы Олжас Құрманбекпен бірге әнші көрермендерге «Stranger» композициясын ұсынды — осылайша әртіс өткен әлемдік турдан жаңасына эстафета тапсырғандай болды.
Димаш түрік тілінде «Yazgi» әнін әсерлі орындады, ал концерттің финалында бүкіл зал «Give Me Your Love» мен «Жаңа күн» атты жаңа әнге биледі.