Ғалымдардың болжамынша, қазіргі Эль-Ниньо бақылау тарихындағы ең күшті болуы мүмкін. Мұхиттың атмосфераға бөлетін жылуы жаһандық температураны көтеріп, жауын-шашын сипатын өзгертеді. Ғалымдар Тынық мұхиттың негізгі аймағында теңіз бетінің температурасы орташа деңгейден 0,5°C немесе одан да жоғары болғанда Эль-Ниньо деп жариялайды. Қазіргі өлшемдер бойынша бұл көрсеткіш нормадан айтарлықтай жоғары — 2°C-тан астам.
Ұлыбритания Метеорологиялық қызметінің соңғы болжамдары бойынша, жыл соңына қарай Эль-Ниньо шарықтау шегіне жеткенде, температуралық ауытқулар 3°C-тан асуы мүмкін. Бұл 1950 жылдан бері бақылау тарихында теңдесі жоқ оқиға болады және XIX ғасырдан бергі ең күшті құбылысқа айналуы ықтимал. Кей жерлерде 100 метр тереңдіктегі су температурасы нормадан шамамен 8°C-қа жоғары — бұл Эль-Ниньоны күшейтіп, құбылысты қоректендіретін жылы су қорын құруы мүмкін.
Американдық Berkeley Earth зерттеу тобының климатологы Зик Хаусфатердің айтуынша, құбылыс әлі дамып келе жатқандықтан, оның рекордтық деңгейге жететініне негіз бар. Кейбір басқа климаттық топтар Метеорологиялық қызмет күткеннен де күштірек құбылысты болжап отыр — мүмкін, ауытқу 4°C құрайды. Егер бұл орын алса, Хаусфатердің пікірінше, Эль-Ниньо соңғы 500 тіпті 1000 жылдағы ең күшті болуы мүмкін, дегенмен соншалықты алыс өткенді нақты айту мүмкін емес.