2027 жылдың ортасынан бастап Қазақстан банктері тұрақты даму стандарттарын (ESG) күшейтуге міндетті болады: бейінді бөлімшелер құру, қызметкерлерді оқыту және ESG-есептерін дайындау. Банктердің негізгі шығындары әдістемелік базаны қалыптастыруға, аналитика жинауға және экологтарды тартуға кетеді, деп хабарлайды infohub.kz сайты.
ESG (Environmental, Social, and Governance) — экология, әлеуметтік жауапкершілік және корпоративтік басқару мәселелерін қамтитын стандарттар жиынтығы. Экологиялық бағыт қоршаған ортаны қорғауды, көмірқышқыл газының шығарындыларын азайтуды, ресурстарды үнемдеуді және қалдықтарды қайта өңдеуді қамтиды. Әлеуметтік жауапкершілік қауіпсіз еңбек жағдайларын, қызметкерлерге лайықты жалақы мен қолдау көрсетуді, инклюзивтілік пен қайырымдылықты білдіреді. Корпоративтік басқару — адал және ашық басшылық, сыбайлас жемқорлыққа қарсы күрес, қызметтің ашықтығы және акционерлердің құқықтарын қорғау.
ESG стандарттарын енгізу компаниялардың тұрақты дамуға, ашықтыққа және тәуекелдерді жауапкершілікпен басқаруға ұмтылысын көрсетеді. Бұл олардың инвестициялық тартымдылығын арттырып, операциялық тәуекелдерді азайтады және нарықтағы беделін жақсартады.
Әдетте бұл ерікті шешім. Алайда «Ручная экономика» Telegram-арнасы соңғы жылдары Қазақстанда қаржы ұйымдары үшін ESG-ақпаратты ашу кезең-кезеңімен міндетті бола бастағанын хабарлайды. Ал 2027 жылдың ортасынан бастап банктер осындай стандарттарды күшейтуге міндетті болады, бұл олардың шығындарының өсуіне әкеледі.
«Банктерге тұрақты даму жөніндегі бөлімшелер құру немесе қызметкерлер тарту міндеттеледі, олар ESG практикаларын енгізіп, тиісті құжаттарды әзірлеп, қызметкерлерді тұрақты даму, экологиялық және әлеуметтік тәуекелдер бойынша оқытып, ESG-есебін дайындауды үйлестіреді», — делінген дереккөзде.
Дереккөздің хабарлауынша, Еуразиялық банк басқармасының төрағасы Ләззат Сатиева ESG талаптарын күшейту кезінде банктер үшін негізгі шығындар әдістемелік базаны қалыптастыруға, аналитикалық ақпарат жинауға, соның ішінде банк штатына экологтарды тартуға және консалтингке байланысты туындайтынын атап өтті. Алайда ол ESG-ге арналған мұндай шығындардың өсуі халыққа арналған кредиттік өнімдерге ауыстырылуы мүмкін деп санамайды.
«Біз бұл шығындарды кредиттеу құнының өсуіне әкеп соғатын фактор ретінде қарастырмаймыз. Кредит мөлшерлемесі факторлардың тұтас кешенін ескере отырып қалыптасады, сондықтан банктің ESG-практикаларын енгізуге жұмсаған шығындарының кредиттеу құнына тікелей әсері туралы айту дұрыс болмас еді», — деді Ләззат Сатиева.
Яғни, ESG қағидаттарын енгізу тәсілін күшейту талабы екінші деңгейдегі банктердің шығындарының ұлғаюына әкелуі мүмкін. Алайда бұл оларды өтеу үшін кредиттеу құнына әсер етпеуі тиіс.