Франция ұлттық құрамасының 2026 жылғы футболдан әлем чемпионатының жартылай финалында жеңілуі елдің ірі қалаларында, оның ішінде Парижде жаппай тәртіпсіздіктер мен көше қақтығыстарын тудырды. Жанкүйерлердің наразылығы тонауларға, өртеулерге және полициямен қатаң қақтығыстарға ұласты, деп хабарлайды infohub.kz.
Техастағы стадионда өткен матч Испания құрамасының сенімді жеңісімен аяқталды. Микель Оярсабальдың (22-минутта пенальтиден) және Педро Порроның (58-минутта) соққан голдары француздарды қатарынан үшінші әлем чемпионаты финалында бақ сынау мүмкіндігінен айырды.
Times of India басылымының хабарлауынша, финалдық ысқырықтан кейін бірден наразылық толқыны тек стадионды ғана емес, француз көшелерін де шарпыды. Жанкүйерлер бас бапкер Дидье Дешамды шабуылдағы үйлесімнің жоқтығы үшін, сондай-ақ команда капитаны Килиан Мбаппені әлсіз ойын көрсеткені үшін қатты сынға алды.
LiveMint іскерлік порталының мәліметінше, көптеген француз қалаларында лезде стихиялық тәртіпсіздіктер басталды. Ашуланған жанкүйерлер тобы қала инфрақұрылымын бұзып, тұрақта тұрған көліктер мен қоқыс жәшіктерін өртей бастады.
Париждегі Елисей даласы мен басқа да маңызды нүктелердегі агрессивті тобырды тарату үшін полиция арнайы құралдар мен көзден жас ағызатын газ қолданды. Әлеуметтік желілерде жанған көшелер мен жандармдардың наразылармен қақтығыстарының кадрлары тарады.
Сарапшылардың айтуынша, ірі футбол матчтарынан кейінгі көше тәртіпсіздіктері Франция үшін алаңдатарлық үрдіске айналды. Осыған ұқсас ауқымды тонаулар 2026 жылы мамыр айында «Пари Сен-Жермен» Чемпиондар лигасында жеңіске жеткеннен кейін (сол кезде 200-ден астам адам зардап шегіп, 900-ге жуық бұзақы ұсталған), сондай-ақ ағымдағы турнирдің ширек финалында Францияның Мароккодан жеңгенінен кейін де орын алған.