Биылғы тамызда Қазақстанда бөлу желілері арқылы жеткізілетін газ бағасы айтарлықтай өсті. Ұлттық статистика бюросының деректеріне сәйкес, бір ай ішінде бұл отын түріне тарифтер орта есеппен 29,5%-ға қымбаттады — бұл барлық коммуналдық қызметтер арасындағы ең байқаларлық өсім болды. Ал қалған тұрғын үй-коммуналдық қызметтердің бағасы шамалы — 1%-ға дейін ғана өсті, деп хабарлайды infohub.kz сайты.
Елдегі жылдық инфляция тамыз қорытындысы бойынша 9,8%-ға дейін төмендеді — бұл соңғы бір жарым жылдағы ең төменгі көрсеткіш. Дегенмен, көптеген тауарлар мен қызметтер әлі де бір жыл бұрынғыдан айтарлықтай қымбат. Бұл әсіресе газға қатысты: жыл басынан бері оның құны 34,9%-ға, ал жылдық мәнде 20%-ға өсті.
Қалған коммуналдық қызметтер арасында бір ай ішінде тек шамалы өсім байқалды: ыстық су 1%-ға, электр энергиясы 0,9%-ға, суық су 0,5%-ға қымбаттаса, үйді күтіп-ұстау тарифтері 0,6%-ға өсті. Ал кәріз жүйесі 0,1%-ға арзандады, жылу мен қоқыс шығару құны өзгерген жоқ.
Жылдық көрсеткіште коммуналдық қызметтердің баға динамикасы былайша көрінеді: суық су 40,9%-ға арзандады, орталық жылу 0,1%-ға, қоқыс шығару 0,7%-ға, кәріз 1,5%-ға, ыстық су 3,6%-ға, электр энергиясы 4,0%-ға, үйді күтіп-ұстау 5,6%-ға, ал газ 20,0%-ға қымбаттады.
Осылайша, барлық коммуналдық қызметтер арасында тек газ бір ай ішінде де, бір жыл ішінде де айтарлықтай қымбаттады, ал қалған қызметтердің бағасы қалыпты қарқынмен өсуде. Бұған дейін Қазақстанның қай өңірінде тауарлар мен қызметтер бағасы ең көп өскені туралы хабарлаған болатынбыз.