Қытайлық инвесторларға тиесілі «Георесурс Азия» компаниясы 2027–2031 жылдары Қарағанды облысының Ақтоғай ауданында жалпы ауданы 81,3 шаршы шақырымды құрайтын 35 блокта геологиялық барлау жұмыстарын жүргізеді. Бұл туралы компанияның жария талқылау аясында ұсынған жоспарланып отырған қызметі туралы мәлімдемесінде айтылған, деп хабарлайды infohub.kz сайты.
«Іздестіру жұмыстарының негізгі міндеттері: аумақтың геологиялық құрылысын нақтылау; мыс пен молибденнің шашырау ореолдарын бағалау; полиметалл элементтерінің шашырау ореолдарын бағалау; белгіленген кенді бақылау факторлары мен іздестіру белгілерін ескере отырып, кен сыйыстырушы қабаттарды картаға түсіру және сынамалау; кенді аймақтар мен кен денелерін бақылау және сынамалау», — делінген мәлімдемеде.
Егер мыс пен молибденнің бар екені расталып, алынған деректер кен құрамы мен кен орнын игерудің тау-кен геологиялық жағдайларын алдын ала бағалауға мүмкіндік берсе, «Георесурс Азия» техникалық-экономикалық негіздеме дайындайды. Соның негізінде компания учаскені одан әрі игерудің орындылығы туралы шешім қабылдайды.
Геологиялық барлау аясында бұрғылау, тау-кен және геофизикалық жұмыстар, сондай-ақ басқа да зерттеулер жүргізу жоспарлануда.
Бұрғылау көлемі 2030 жылға дейін ұлғаяды. 2028 жылы компания 2300 погондық метр, 2029 жылы — 3100 метр, 2030 жылы — 4200 метр бұрғылауды жоспарлап отыр. 2031 жылы бұрғылау көлемі 810 метрге дейін қысқарады.
Тау-кен жұмыстары барлаудың бүкіл кезеңіне жоспарланған. 2027 жылы олардың көлемі 2400 текше метрді, 2028 жылы — 3100 текше метрді, 2029 жылы — 4300 текше метрді, 2030 жылы — 3600 текше метрді, ал 2031 жылы — 1765 текше метрді құрайды.
Бұрғылау үшін CDH-1600 қондырғысының үшеуі пайдаланылады. Далалық лагерді электрмен жабдықтауды Elitech БЭС8000ЕТМ бензин генераторы қамтамасыз етеді, ал бұрғылау станогын жарықтандыру үшін қуаты 17 кВт дизельдік электр станциясы қолданылады.
Компания жылына шамамен 1,5 тонна бензин және 20-дан 50 тоннаға дейін дизель отынын жұмсауды жоспарлап отыр. Бұл көлемдер геологиялық барлау жұмыстарының бүкіл кезеңіне есептелген.
Барлау қорытындысы бойынша «Георесурс Азия» халықаралық стандарттар бойынша болжамды қорларға жедел баға алуды және учаскеге ірілендірілген геологиялық-экономикалық бағалау жүргізуді көздеп отыр.
Учаске Балқаш көлінен шамамен 40 км оңтүстікке қарай орналасқан. Ең жақын ірі елді мекен — Балқаш қаласы. Компания барлауға лицензияны 2026 жылғы 21 ақпанда алған.
Мыс іздеуге деген қызығушылық әлемдік металл бағасының жоғарылығына байланысты артып келеді: соңғы уақытта Лондон металл биржасындағы мыс бағамы тоннасына 14 мың доллардан асқан.
Жарияланым дайындалған сәтте «Георесурс Азия» (Астана) компаниясының жалғыз иесі — Қытайдағы Yaohua Group (Hong Kong) Co., Limited. Компания 2025 жылғы 16 сәуірде тіркелген. eGov жүйесінде оның негізгі қызмет түрі ретінде асыл және жартылай асыл тастарды, асыл тастар мен кәріптасты өндіру көрсетілген.