Спутниктер Гренландияның солтүстік-батысындағы Петерманн мұздығынан 2012 жылдан бергі ең ірі мұз бөлінуін тіркеді. Пайда болған стол тәрізді айсбергтің ауданы 76 шаршы шақырым — бұл Манхэттеннің көлемімен салыстырылады, ал қалыңдығы 150 метрге жетуі мүмкін, деп хабарлайды infohub.kz.
Еуропалық ғарыш агенттігі «Коперник-Сентинел-1» спутнигі арқылы 2026 жылдың 4 тамызында Петерманн мұздығынан қалқымалы мұз массиві бөлінгенін анықтады. 3 тамыздағы суреттер қалқымалы мұз тілінің ортасында жарықшақ пайда болғанын көрсетсе, келесі күні алып массив шығыс жағынан толық бөлініп кеткен.
Оттава, Лидс, Ланкастер және Стирлинг университеттерінің халықаралық ғалымдар тобы бірнеше жыл бойы жарықтардың дамуын бақылаған. Оттава университетінің өкілі Адам Гарбоның айтуынша, зерттеушілер бұл жарықшақты бұрыннан күткен.
Ғалымдар кезекте тағы екі ірі бөлік — ауданы 97 және 87 шаршы шақырым болатын мұз кесектері тұрғанын айтады. Канадалық мұз қызметінің мамандары мұз аралының дрейфін бақылай бастады, өйткені мұндай нысандар кеме қатынасына қауіп төндіреді.