ФИФА президенті Джанни Инфантино өзінің жылдық жалақысын қазіргі €3 млн-нан €30 млн-ға дейін, яғни он есеге жуық арттыра алар еді. Мұндай сценарий әлем чемпионаттарының коммерциялық құқықтарының бір бөлігін сату жобасы аясында қарастырылған, деп хабарлайды infohub.kz сайты The Times-ке сілтеме жасап.
Басылымның мәліметінше, Инфантино ФИФА коммерциялық активтерді басқару үшін құруды жоспарлаған FIFA Forward Enterprise (FFE) жаңа компаниясын басқарғаны үшін қосымша бонустар ала алар еді.
Ұйымның жоспарлары 28 шілдеде белгілі болды. ФИФА $20 млрд бағаланған FIFA Forward Enterprise құрып, компанияның 25% сыртқы инвесторларға $4,2 млрд-қа сатуды көздеген.
БАҚ деректері бойынша, акциялардың шамамен 20%-ын Джошуа Кушнер бастаған инвесторлар тобы сатып алуы тиіс еді. Оның ағасы Джаред Кушнер АҚШ президенті Дональд Трамптың күйеу баласы.
Financial Times бұл жобаға бірнеше ай бойы JPMorgan, ФИФА және Кушнер тобы жұмыс істегенін хабарлаған.
Алайда бұл бастама футбол федерацияларының қатты қарсылығына тап болды. Мәмілеге УЕФА, КОНКАКАФ, Азия футбол конфедерациясы және КОНМЕБОЛ қарсы шықты. Сонымен қатар, УЕФА-ның барлық 55 мүшесі кезектен тыс жиналыста ФИФА бұл жобадан бас тартпаса, оның эгидасымен өтетін турнирлерге бойкот жариялау туралы шешім қабылдады.
Сынның қысымымен 1 тамызда Инфантино ФИФА әлем чемпионаттарының коммерциялық құқықтарының бір бөлігін сатпайтынын мәлімдеді. Осыдан кейін УЕФА қазіргі ФИФА басшылығы «тек УЕФА-ның ғана емес, футбол отбасының көптеген басқа мүшелерінің де сенімінен айырылды» деп мәлімдеді.
Бұған дейін The Telegraph УЕФА Инфантиноға ультиматум қойғанын хабарлаған: не отставкаға кету, не сенімсіздік вотумына тап болу.
Джанни Инфантино ФИФА-ны 2016 жылдан бері басқарады. Ол бұған дейін келесі жылдың наурыз айында ұйым президенттігіне қайта кандидатурасын ұсыну ниетін білдірген.