Ресейлік зерттеушілер Каспий теңізі алабынан ғылымға беймәлім екі жаңа балық түрін тапты. Оның біреуі Қазақстан жағалауынан тікелей табылған, деп хабарлайды infohub.kz сайты.
Балық су қоймасының шығыс бөлігінде ауланды, әрі мүлдем күтпеген жерден: оны су жыланының аузынан суырып алды, жыртқыш олжасын ұстап үлгерген еді.
Жаңа түрге каспий пуголовочкасы (Benthophiloides caspius) деген атау берілді. Ғалымдар оны өте сирек кездесетін түр санайды, өйткені қазірге дейін бірнеше дарақ қана табылған. Зерттеушілер олардың ДНҚ-сын зерттеп, Каспийдің басқа бұзаубас балықтарымен салыстырды. Сөйтіп, бұл бұрын белгісіз түр екені анықталды.
Екінші балықты скиф бұзаубас-цуцигі (Proterorhinus scythicus) деп атады. Ол теңізден емес, Еділ атырауы мен Шығыс Маныч өзенінен табылды. Зерттеушілердің дерегінше, жаңа түр каспий бұзаубастарына емес, Қара теңіз алабындағы туыстарына жақын болып шықты.
Ғалымдар бұл байланыс шамамен 2,1 млн жыл бұрын Қара және Каспий теңіздерінің алаптары арасында ежелгі су байланысы болғандықтан туындаған деп болжайды. Сондықтан жаңа түр Қара теңіз жағалауында өмір сүрген скифтердің құрметіне аталған.
Жалпы, ғалымдар көптен бері жан-жақты зерттеп келе жатқан аймақтан жаңа түрлердің жақында ғана табылғаны таңғаларлық. Бәлкім, бұрын олар байқалмаған болар, өйткені кейбір бұзаубас балықтар бір-біріне ұқсас. Мұндай жағдайда алдыңда жеке түр тұрғанын тек ДНҚ талдауы арқылы анықтауға болады.
Бұған дейін Kursiv LifeStyle қытайлық ғалымдар ара бұзаубас балығының жаңа түрін ашып, оны оңтүстіккореялық әнші Дженнидің (Jennie) құрметіне BLACKPINK k-pop тобының атымен атауды ұйғарғанын жазған еді.