Қазақстанның Қаржы мониторингі агенттігі Өзбекстан азаматы Махмуд Хикматовты (Маха.dxb бүркеншік атымен танымал) халықаралық іздеу жариялады, деп хабарлайды infohub.kz сайты.
Агенттіктің баспасөз қызметінің мәліметінше, іздеу жарияланған блогер Маха.dxb — Хикматов Махмуд Умидович, 2000 жылы туған, Өзбекстан Республикасының азаматы.
Сот оған қатысты қамауда ұстау түріндегі бұлтартпау шарасын санкциялады. Ол заңсыз интернет-казиноны жылжытуға күдікті. Қазақстан Республикасының аумағында интернет-казиноның заңсыз интерфейсін ұсыну, ақша қаражатын қабылдау және төлеу (эквайринг, мобильді коммерция, криптовалюта), сондай-ақ ел азаматтарының арасынан көбірек ойыншыларды тарту мақсатында жарнама жасау бойынша тұрақты схема жұмыс істеген.
ҚМА-нің мәлімдеуінше, интернет-казиноны жылжыту үшін ұйымдастырушылар блогер Хикматовты тартқан, оған Қазақстан аумағында қызмет ететін инфлюенсерлерді жарнамалық контент орналастыруға тарту рөлі жүктелген. Осы қызмет аясында Хикматов блогерлерден олардың әлеуметтік желілерінің статистикалық деректерін, оның ішінде демографияны, жазылушылар географиясын, сондай-ақ аудитория қамту көрсеткіштерін сұраған, осының негізінде жарнама қызметтерінің құны анықталған. Барлығы ол 35-тен астам блогерді, оның ішінде Қамза Қ. блогерін тартқан.
Кең аудиторияға ие бола отырып, Қамза Қ. интернет-казиноға рефералдық сілтемелер орналастырып, әрбір пайдаланушының өтуі үшін сыйақы алып, Қазақстан Республикасының азаматтарын тыйым салынған құмар ойын әрекетіне қасақана тартқан.
6 тамызда Қамза Қ. Вьетнам Социалистік Республикасынан экстрадицияланды. Егер сізге іздеудегі адамның орналасқан жері туралы қандай да бір ақпарат белгілі болса, Қаржы мониторингі агенттігіне мына телефондар бойынша хабарлауды сұраймыз: +7 7172 70 84 78 — кезекші бөлім. Сыйақы және анонимділік кепілдендіріледі.
Бұған дейін құқықтық статистика және арнайы есепке алу органдарының порталында блогер Қайсар Қамзаға арналған бағдарлама жарияланған. Бастамашысы — Қаржы мониторингі агенттігі, іздеуді ҚМА-нің Астана қаласы бойынша экономикалық тергеу департаменті жүргізуде. Кейін Қайсар Қамза Қаржы мониторингі агенттігінің оны іздеу жариялағаны туралы ақпаратқа түсініктеме берді. Көп ұзамай ҚМА блогерді заңсыз құмар ойын әрекетіне көмектесті деп күдіктенетінін мәлімдеді.
5 жыл бойы күдікті Instagram-да "qais_arr" (2,4 млн жазылушы) атауымен белсенді блогерлік қызмет жүргізген, сондай-ақ Telegram-да "Қора энтертейнмэнт" жабық арнасын (368 мың жазылушы) басқарған. 13 сәуірде оның Вьетнамда ұсталғаны белгілі болды. Мамыр айында ол ұзақ уақыттан кейін алғаш рет жазылушылармен байланысқа шығып, Вьетнамда ұсталғанын айтты. 6 тамызда Бас прокуратура заңсыз құмар ойын бизнесін ұйымдастыруға көмектесті деп күдіктелген блогер Қайсар Қамзаның Вьетнамнан экстрадицияланғанын хабарлады.