Қазақстанның NVIDIA және Firebird AI-мен бірлесіп дамытып жатқан Data Center Valley жобасы аясындағы алғашқы деректер орталығын 2027 жылы маусымда пайдалануға беру жоспарлануда. Бұл туралы премьер-министр Олжас Бектеновтің төрағалығымен өткен кеңесте «Қазақтелеком» басшысы Бағдат Мусин мәлімдеді, деп хабарлайды infohub.kz сайты.
Оның айтуынша, қуаты 50 МВт болатын алғашқы нысанның құрылысы қазірдің өзінде жүріп жатыр. Қазір энергоорталықтар мен AI-фабрикаларға арналған шұңқырларды әзірлеу жұмыстары 90%-ға аяқталған. Алаңда энергоорталықтардың іргетасын қалау басталып, әкімшілік-тұрмыстық ғимараттарды салу жалғасуда.
2026 жылдың желтоқсан айының соңына дейін мердігерлер деректер орталығы мен энергоблоктардың негізгі корпустарын, әкімшілік-тұрмыстық кешенді, бақылау-өткізу пункттерін және сыртқы инженерлік желілердің бір бөлігін салуы тиіс. Іске қосу-реттеу жұмыстарын 2027 жылы мамырда аяқтау жоспарлануда.
«Біздің басты міндетіміз – алғашқы нысанның құрылысын 2027 жылы маусымда аяқтау. Сонымен қатар, клиенттер тарапынан расталған сұранысты ескере отырып, кампус қуатын кезең-кезеңімен арттыруға мүмкіндік беретін инженерлік негізді жасап жатырмыз», – деді Мусин.
Жобаны электрмен жабдықтау үшін қуаты 215 МВт қосалқы станция сатып алынған. Сондай-ақ сумен жабдықтау желілерінің жобасы әзірленіп, телекоммуникациялық инфрақұрылымды жобалау жалғасуда. Құрылыс алаңында тәулік бойы онлайн бейнебақылау жүйесі жұмыс істейді. Болашақта Data Center Valley қуатын кезең-кезеңімен 1 ГВт-қа дейін арттыру жоспарлануда.
Жоба деректер орталықтарын, AI-фабрикаларды, GPU-кластерлерді және халықаралық технологиялық компаниялардың бұлтты платформаларын орналастыруға арналған алаң құруды көздейді. Үкіметте бұл Қазақстанда цифрлық экономиканың жаңа экспорттық секторын құруға және жасанды интеллект саласындағы отандық әзірлемелерге инфрақұрылымды қамтамасыз етуге мүмкіндік береді деп санайды.
«Data Center Valley Қазақстанның жаңа экспорттық әлеуетін қалыптастырады. Есептеу қуаттарын ел ішінде орналастыра отырып, біз отандық AI-шешімдерді дамытуға, жаһандық компанияларды тартуға және Қазақстанның халықаралық цифрлық қызметтер нарығына шығуына жағдай жасаймыз», – деп атап өтті жасанды интеллект және цифрлық даму министрі Жаслан Мадиев.
Data Center Valley аясында Қазақстан Firebird AI және NVIDIA-мен ынтымақтастықты да дамытуда. Бұған дейін, 2026 жылдың сәуірінде президент Қасым-Жомарт Тоқаев NVIDIA-ның жаһандық AI-инфрақұрылымды дамыту жөніндегі вице-президенті Николо Мартин Капрезамен және Firebird AI негізін қалаушылар Размиг Берг Овакимян мен Александр Есаянмен кездескен болатын. Сонда тараптар AI-инфрақұрылымды жобалау, салу және пайдалану бойынша бірлескен жұмыс перспективаларын талқылады.
Кездесу барысында мемлекет басшысы Екібастұзда Data Center Valley құру жоспарлары туралы айтып, оны қолжетімді электр энергиясы, телекоммуникациялар және инвесторларға салықтық преференциялар бар алаң ретінде сипаттады. Келіссөздер қорытындысы бойынша тараптар AI-экожүйені дамытуда бірлескен қызмет мүмкіндіктерін зерделеуге келісті.
Сонымен қатар, премьер-министр кеңесінде Cloud First Policy (Data Embassy) жобасын дайындау мәселесі қаралды. Бұл жоба шет мемлекеттердің деректерін олардың толық заңды егемендігін сақтай отырып, Қазақстанда орналастыруға мүмкіндік береді.
Кеңес қорытындысы бойынша Бектенов мемлекеттік органдар мен квазимемлекеттік компанияларға құрылыс жұмыстарын белгіленген мерзімде орындауды қамтамасыз етуді және шетелдік технологиялық серіктестерді тарту жұмыстарын жалғастыруды тапсырды.
Бұған дейін «Курсив» Қазақстанда халықаралық есептеу қуаттары хабын құру ниеті туралы жазған болатын.