Қазақстан еріктілер қозғалысын дамыту бойынша әлемдік көшбасшылар қатарына енді, деп мәлімдеді БҰҰ Еріктілер бағдарламасының атқарушы үйлестірушісі Тойли Курбанов президент Қасым-Жомарт Тоқаевпен кездесуде, деп хабарлайды infohub.kz.
Кездесу барысында мемлекет басшысы Тойли Курбановқа Қазақстанның еріктілік саласындағы бастамаларын қолдағаны және Астанада өткен ТМД еріктілер форумына қатысқаны үшін алғыс білдірді.
Президент Қазақстан еріктілер қозғалысын дамытуға ерекше көңіл бөлетінін атап өтті. «Оның дәлелі — еліміздің 2026 жылды Тұрақты даму жолындағы Халықаралық еріктілер жылы деп жариялау туралы ұсынысы, оны БҰҰ Бас Ассамблеясы қолдады», — деп еске салды ол.
Тоқаев ел еріктілікті шынайы патриотизм мен жастарды қолдаудың көрінісі ретінде қарастыратынын атап өтті. Сондай-ақ ол халықаралық еріктілер жылы аясында Қазақстанда мыңнан астам іс-шара өтіп жатқанын, ал еріктілер саны 300 мыңға жуықтағанын айтты.
Тойли Курбанов өз кезегінде мемлекет басшысына еріктілер қозғалысын дамытуға көңіл бөлгені үшін алғыс айтып, БҰҰ Еріктілер бағдарламасымен ынтымақтастық деңгейі жоғары екенін атап өтті. «60-тан астам ел Қазақстанның Еріктілер жылын жариялау туралы бастамасын қолдады. Сіз жаһандық трендтерді белгілеп отырсыз, «Таза Қазақстан» сияқты қоғамдық акция бірқатар елдерде үлкен қызығушылық тудырды», — деді ол.
Қорытындылай келе, Қасым-Жомарт Тоқаев БҰҰ Еріктілер бағдарламасының атқарушы үйлестірушісін Қазақстанда еріктілікті дамытуға қосқан елеулі үлесі үшін «Достық» орденінің II дәрежесімен марапаттады.