Қазақстан әлемнің ең бәсекеге қабілетті экономикаларының халықаралық рейтингісінде 38-орынға тұрақтап, ТМД елдерінің ішінен осы тізімге енген жалғыз мемлекет атанды. Бұл туралы IMD World Competitiveness Center жариялаған жаһандық зерттеу қорытындысында айтылған, деп хабарлайды infohub.kz сайты.
Швейцариялық IMD World Competitiveness Center орталығының жыл сайынғы зерттеуі әлемнің 70 елінің экономикасын төрт негізгі бағыт бойынша бағалайды: экономикалық көрсеткіштер, үкімет тиімділігі, бизнес тиімділігі және инфрақұрылым. Ағымдағы тізімде Қазақстан 65.4 балл жинап, 38-орынға ие болды.
Рейтингтің басында әлемнің жетекші 10 елі орналасты: Сингапур (100 балл), Гонконг (95.6 балл), Швейцария (95.3 балл), Тайвань (94.3 балл), БАӘ (94.1 балл), Дания (94.1 балл), Ирландия (94.1 балл), Нидерланд (90.1 балл), Швеция (88.5 балл) және АҚШ (86.8 балл).
Осы жаһандық тізімде Қазақстан өз көрсеткіштерінің арқасында Испания, Португалия, Польша, Италия және Аргентина сияқты бірқатар мемлекеттерді басып озды.
Елдің төрт негізгі бағыт бойынша жеке профилінде мынадай көрсеткіштер тіркелген: үкімет тиімділігі (Government Efficiency) бойынша Қазақстан 63.0 балл жинап, 23-орынға тұрақтады. Бизнес тиімділігі (Business Efficiency) бағытында ел 66.5 баллмен 23-орынды иеленді.
Сонымен қатар инфрақұрылым (Infrastructure) көрсеткіші 46.2 баллды құрап, бұл салада ел 43-орында орналасты, ал экономикалық көрсеткіштер (Economic Performance) бағыты бойынша 43.5 баллмен 57-орынға бекіді.
Зерттеу аясында Қазақстанның негізгі макроэкономикалық көрсеткіштері де ұсынылды: жалпы ішкі өнім (ЖІӨ) көлемі 306.2 миллиард долларды құрап, бұл көрсеткіш бойынша ел 44-орынға тұрақтады.
Сатып алу қабілетінің паритеті (САҚП) бойынша жан басына шаққандағы ЖІӨ 45,286.3 долларға жетіп, 43-орынды бекітті. Елдің ЖІӨ-нің нақты өсімі 6.5%-ды құрап, бұл көрсеткіш бойынша ел 6-орында тұр.
Бұл ретте халық саны 20.4 миллион адамды (32-орын), жұмыссыздық деңгейі 4.6%-ды (31-орын), ал тұтыну бағаларының инфляциясы 11.4%-ды (65-орын) құрады.