Қазақстандық мамандар Душанбедегі әріптестерімен тәжірибе бөлісіп, екі күн ішінде күрделі оталар жасап, жүзден астам консультация өткізді, деп хабарлайды infohub.kz сайты.
Сапар аясында қазақстандық дәрігерлер Ұлттық травматология және ортопедия ғылыми орталығының мамандары Тәжікстандағы науқастарды емдеуде заманауи аз инвазивті әдістерді қолданды. Жұмыс бірнеше бағытта жүргізілді: омыртқа хирургиясы, аяқ пен тобық буынының ортопедиясы, сондай-ақ артроскопия.
Ең күрделісі омыртқаға жасалған оталар болды. Бөлім меңгерушілері Мұрат Байдарбеков пен Сейдалы Абдалиев бел омыртқасының дегенеративті стенозы, айқын түбіршік ауырсыну синдромы бар науқас әйелге ота жасады. Хирургтар екі деңгейде (L4-L5 және L5-S1) жүйке құрылымдарына декомпрессия жасап, транспедикулярлық жүйе мен денеаралық кейдждер орнатты.
Тағы бір ота сколиозы бар 13 жастағы науқас қызға жасалып, оған омыртқаның күрделі деформациясы түзетілді.
Аяқ және тізе буыны хирургиясы саласында №2 ортопедиялық бөлімнің меңгерушісі Қайрат Тажин тобық буынының III дәрежелі посттравматикалық артрозы және айқын аяқ деформациясы бар 24 жастағы науқасқа ота жасады. Жас жігітке деформацияны түзету және аяқты тұрақтандыру үшін үш буынды артродез жасалды.
Тағы бір науқас әйелге тобық буынының тұрақсыздығына байланысты Уотсон бойынша пластика жасалды. Аз инвазивті араласуды артроскопия және спорттық жарақат бөлімінің меңгерушісі Нұржан Асанов орындады. Ол сондай-ақ тізе буынына екі артроскопиялық ота жасады: медиальды мениск тігісі және капсула-байлам аппаратының пластикасы.
«Тәжікстандағы екі күндік жұмыс барысында қазақстандық мамандар жүзден астам консультация өткізіп, он шақты хирургиялық ота жасады», — делінген Денсаулық сақтау министрлігінің хабарламасында.