Қазақстан Республикасының Энергетика министрлігі Еуразиялық экономикалық одақтың кедендік аумағынан тыс жерлерге маусымаралық кезеңде жол битумын шығаруға мүмкіндік беретін өзгерістер дайындады. Мұнай битумын жекелеген мұнай өнімдерін экспорттауға қолданыстағы тыйымнан алып тастау ұсынылып отыр, деп хабарлайды infohub.kz сайты.
Энергетика министрінің бұйрық жобасы «Қазақстан Республикасының аумағынан мұнай өнімдерін шығарудың кейбір мәселелері туралы» 2026 жылғы 30 сәуірдегі № 175-н/қ бұйрыққа өзгеріс енгізуді көздейді.
Құжат ұлттық қауіпсіздік және сауда қызметін реттеу туралы заңнаманың талаптарын, Еуразиялық экономикалық одақ туралы шарттың ережелерін, сондай-ақ Қазақстан Республикасы Премьер-министрі Олжас Бектеновтің 2026 жылғы 23 шілдедегі Маңғыстау облысына жұмыс сапарының қорытындысы бойынша хаттаманы ескере отырып әзірленген.
Негізгі өзгеріс ЕАЭО СЭҚ ТН 2713 20 000 0 коды бар мұнай битумына қатысты. Оны ЕАЭО кедендік аумағынан тыс жерлерге шығаруға тыйым салынған өнімдер тізбесінен алып тастау ұсынылып отыр.
Энергетика министрлігінде мұндай шешімнің қажеттілігін ең алдымен жол битумын тұтынудың маусымдылығымен байланыстырады. Бұл өнім түріне негізгі сұраныс жол құрылысы қарқынды жүрген кезеңге түседі, ал маусымаралық кезеңде тұтыну төмендейді.
«Сонымен қатар отандық кәсіпорындардың бос өндірістік қуаттары бар, ал мұнай өңдеу зауыттары тұрақты жүктемені қамтамасыз етуі қажет. Экспортқа рұқсат маусымдық сұраныс төмендеген кезеңде ішкі нарықта сұранысқа ие болмай қалған жол битумының көлемін сыртқы нарықтарға жөнелтуге мүмкіндік береді», — делінген бұйрық жобасының түсіндірме жазбасында.
Осылайша, ұсынылып отырған шара өндірушілерге қосымша өткізу арнасын беріп, сонымен бірге мұнай өңдеу кәсіпорындарының жүктемесін біркелкі етуді қамтамасыз етуі тиіс. Экспорт жол битумын ішкі тұтыну қысқаратын маусымаралық кезеңде жүзеге асырылмақ.