Қазақстанда жасанды интеллекттің дамуына байланысты мектеп пәндерінің мазмұны жаңартылуда. infohub.kz сайтының хабарлауынша, тиісті өзгерістерді Оқу-ағарту министрлігі жариялады.
Ведомство технологиялардың қарқынды дамуы, еңбек нарығы талаптарының өзгеруі және жасанды интеллекттің өмірдің барлық саласына кеңінен енуі білім беру мазмұнын жаңартуды қажет ететінін атап өтті.
«Бұл бағыттағы жүйелі жұмыс мемлекет басшысы Қасым-Жомарт Тоқаевтың 2025 жылы өткен Республикалық тамыз конференциясында берген тапсырмасын орындау үшін басталды. Сол жылдың қыркүйегінен бастап жұмыс кезең-кезеңімен жүргізілуде. Кейіннен бұл жұмыстың құқықтық негізі нығайтылды. 2025 жылдың қарашасында Қазақстан Республикасының «Жасанды интеллект туралы» Заңы қабылданды, ал 2026 жылдың мамырында жасанды интеллектті орта білім жүйесіне енгізу жөніндегі президент Жарлығы шықты», — деп хабарлады министрлікте.
Осы құжаттарды іске асыру аясында мемлекеттік жалпыға міндетті білім беру стандарты, үлгілік оқу жоспарлары мен үлгілік оқу бағдарламалары жаңартылды. 1-4 сыныптардағы «Цифрлық сауаттылық» пәні «Цифрлық сауаттылық және жасанды интеллект» деп, ал 5-11 сыныптардағы «Информатика» пәні «Информатика және жасанды интеллект» деп қайта аталды.
«Бұл тек пән атауларын өзгерту ғана емес. Жасанды интеллект цифрлық технологиялар мен информатиканың ажырамас бөлігіне айналды. Осыған байланысты пәндердің мазмұнына жасанды интеллект бойынша жаңа бөлімдер мен 43 оқу мақсаты енгізілді», — деп атап өтті ведомствода.
Бүгінгі таңда оқушылар күнделікті өмірде жасанды интеллект құралдарын қолданып жүргені айтылуда. Ендігі міндет — оларды бұл технологияны жай ғана пайдалануға емес, оны саналы, тиімді әрі жауапкершілікпен қолдануға үйрету.
Министрлік оқушыларды жасанды интеллектпен қалай таныстыратынын айтты. 1-4 сыныптарда «Медиасауаттылық және ЖИ» бөлімі аясында 17 оқу мақсаты қарастырылған. Оқушылар күнделікті өмірдегі қарапайым мысалдар арқылы жасанды интеллектпен танысады, цифрлық қауіпсіздік негіздерін, жеке деректерді қорғауды және цифрлық ортадағы жауапты мінез-құлықты меңгереді.
5-9 сыныптарда «Компьютерлік ойлау және бағдарламалау», «Денсаулық, қауіпсіздік және ЖИ» бөлімдері аясында 14 оқу мақсаты қарастырылған. Оқушылар оқу процесінде жасанды интеллект құралдарын тиімді пайдалануды, сұраныстарды дұрыс құрастыруды, алынған нәтижелерді сыни тұрғыдан бағалауды, сондай-ақ киберқауіпсіздік пен академиялық адалдық қағидаттарын сақтауды үйренеді.
10-11 сыныптарда «Деректерді басқару және жасанды интеллект» бөлімі аясында 12 оқу мақсаты қарастырылған. Негізгі назар жасанды интеллекттің жұмыс істеу принциптерін түсінуге және оны практикалық қолдануға аударылған. Оқу мазмұнына машиналық оқыту, нейрожелілер, деректерді талдау және қолданбалы криптография негіздері енгізілген.
Ведомство аталған пәндер бойынша жаңартылған оқу бағдарламалары өткен оқу жылында сәтті апробациядан өтіп, оң сараптамалық қорытынды алғанын атап өтті. Қазір олар белгіленген тәртіппен бекіту сатысында тұр.