Бүгін, 3 қыркүйекте, Қазақстанда тұңғыш рет қазақ тазысы мен төбеті күні атап өтілуде, деп хабарлайды infohub.kz.
Президенттің кеңесшісі – баспасөз хатшысы Әйбек Смадияров атап өткендей, тазы – ұлттық ит тұқымы ретінде халықтың мәдени мұрасы мен дәстүрлі өмір салтының ажырамас бөлігі. Бұл тұқым «Жеті қазынаның» қатарына кіреді, адалдықты, ептілік пен күшті бейнелейді.
Ғасырлар бойы тазы мен төбет Ұлы Далада адамның адал серігі болды. Бүгінде олар бізді тарихпен, ата-баба дәстүрлерімен, олардың туған жер табиғатына деген құрметімен байланыстыруды жалғастыруда.
Мемлекет басшысы Қасым-Жомарт Тоқаев тазыны сақтауға, дамытуға және халықаралық деңгейде насихаттауға ерекше көңіл бөледі. Оның тапсырмасы бойынша соңғы жылдары бұл бағытта үлкен жүйелі жұмыс атқарылды. Қазақ тұқымдарын сақтау және көбейту мәселелері бойынша заң қабылданды. Қазақстан Халықаралық кинологиялық федерациясының толыққанды мүшесі болды. 2024 жылы тазы халықаралық деңгейде алдын ала танылды, ал Қазақстан осы тұқымның шыққан елі ретінде ресми бекітілді.
Бүгінде біздің тазылар ірі халықаралық көрмелерде лайықты өнер көрсетуде, асыл тұқымдық база кеңеюде, көбірек адамдар оларды өсірумен айналысуда. Қазақ ит тұқымдарының ұлттық орталығының құрылысы аяқталуда.
Тарихи мұраға, ұлттық дәстүрлерге құрмет, табиғатқа ұқыпты қарау – біздің еліміздің конституциялық құндылықтары. Қазақ тазысы мен төбеті күнінің белгіленуі – ұлттық ит тұқымдарын танымал етуге қосылған тағы бір маңызды үлес.