2026 жылғы тамыз айының қорытындысы бойынша қазақстандықтар отандық банктердегі депозиттер мен шоттарда 30,5 трлн теңгеден астам қаражат жинақтады. Бұл соманың 80%-дан астамы теңгемен сақталып отыр. Журналистердің атап өтуінше, депозиттер жинақ қалыптастырудың ең танымал құралдарының бірі болып қала береді, өйткені екінші деңгейдегі отандық банктер ұсынып отырған пайыздар елдегі инфляциядан айтарлықтай жоғары, деп хабарлайды infohub.kz сайты.
Қазақстан Республикасы Ұлттық банкінің деректеріне сәйкес, тамызда ашылған жеке тұлғалар депозиттері бойынша нарықтағы орташа сыйақы мөлшерлемесі 15,7% болды. Салыстырар болсақ, жалпы инфляция 9,8% деңгейінде тұр. Сонымен қатар мөлшерлемелер үш ай қатарынан төмендеп келеді: шілдеде олар 15,9%, маусымда — 16,2%, ал мамырда нарық бойынша орта есеппен 16,8% болған. Дегенмен кейбір депозиттік өнімдер әлі де 20% шамасындағы мөлшерлемемен жұмыс істеп тұр.
Банк салымдары қазақстандықтар үшін тиімділігі азайып келе жатса да, олардың жалпы көлемі өсуін жалғастырып отыр. Ұлттық банктің деректері бойынша, тамызда жеке тұлғалардың банк депозиттерінде шамамен 30,5 трлн теңге жинақталған. Бір айда сома 0,49%-ға, ал бір жылда бірден 17,33%-ға өсті. Айта кетерлігі, өсім негізінен теңгелік салымдар есебінен болып отыр: олар бір жылда 22,69%-ға артып, 24,7 трлн теңгеге жетті, ал шетел валютасындағы депозиттер 0,94%-ға азайып, 5,9 трлн теңге болды. Қарапайым тілмен айтқанда, қазір азаматтардың барлық жинағының 80%-дан астамы теңгелік салымдарға тиесілі.
Барлық жинақтың басым бөлігі мерзімді және мерзімсіз депозиттерде сақталып отыр — шамамен 24,4 трлн теңге. Тағы 3,6 трлн теңгеге жуық қаражат азаматтардың ағымдағы шоттары мен талап етілгенге дейінгі салымдарында жатыр. Тамызда жинақ депозиттерінде 2,6 трлн теңгеге жуық, ал шартты салымдарда шамамен 7,7 млрд теңге болды.
Осылайша, мөлшерлемелердің төмендеуіне қарамастан, депозиттердің көлемі өсуін жалғастырып отыр. Болашақта шетел валютасындағы депозиттердің шарттары жақсарып, олар салымшылар үшін тартымдырақ болуы мүмкін.