Қытайдың 16 жастағы тұрғыны саябақта төрт сағат бойы цикадалардың шырылын тыңдап, уақытша естуден айырылды. Серуеннен кейінгі күні жігіт құлағында қатты шуылмен оянып, айналадағы дыбыстарды әрең еститін болған. Анасы оны дереу ауруханаға жеткізген, деп хабарлайды infohub.kz.
Медициналық тексеру көрсеткендей, саябақтағы цикадалардың шуы 80–90 децибелге жеткен, бұл қарқынды автокөлік қозғалысының немесе шөп шабатын машинаның шуымен салыстыруға болады. Мұндай қатты дыбыстың ұзақ әсері есту жолындағы түкті жасушалардың зақымдалуына әкелген. Дәрігерлер пациентке "жедел нейросенсорлық есту қабілетінің төмендеуі" диагнозын қойған.
Жасөспірімге стероидты препараттар мен қан тамырларын кеңейтетін дәрілер қолданылатын терапия курсы тағайындалған. Дәрігерлер уақытылы көмекке жүгіну есту қабілетін толық қалпына келтіруге мүмкіндік бергенін атап өтті. Мамандар шулы жәндіктер көп жиналатын жерлерде ұзақ болу рок-концерттерге бару сияқты құлаққа қауіпті екенін ескертеді.