Көкшетауда жергілікті тұрғын 3,4 миллион теңге тұратын зергерлік бұйымдарды ұрлау ісі бойынша қылмыстық істің фигурантына айналды. Оқиға оның ауладан зергерлік бұйымдары бар сөмкені тауып алғаннан кейін болды, деп хабарлайды infohub.kz сайты.
Ақмола облысы полиция департаментінің мәліметінше, Абылай хан даңғылындағы үйдің ауласындағы орындыққа сөмкесін ұмытып қалған әйел арызбен жүгінген. Біраз уақыттан кейін қайтып келгенде, ол заттарын орнынан таппаған.
Полиция қызметкерлері оқиға болған жерге орнатылған бейнебақылау камераларының жазбаларын зерттеді. Жазбалардың арқасында оқиғаның одан әрі дамуын бақылап, қалдырылған сөмкені алған әйелдің тұлғасын анықтау мүмкін болды.
Белгілі болғандай, ол біраз уақыт иесінің қайтуын күткен, бірақ кейін заттарды өзімен бірге алып кетуді шешкен. Үйге қайтар жолда әйел сөмкені тастап, өзіне телефонды, сағатты және зергерлік бұйымдарды қалдырған.
Келесі күні ол алтын сақиналардың бірін 150 мың теңгеге ломбардқа өткізген. Оның айтуынша, алынған ақша азық-түлік пен дәрі-дәрмекке жұмсалған.
«Ұрлық фактісі бойынша сотқа дейінгі тергеу жүргізілуде, тергеу әрекеттері жалғасуда», — деп хабарлады облыстық полиция департаментінде.
Полиция тауып алған мүлікті иемдену де ұрлық ретінде сараланып, заң бойынша жауапкершілікке тартылатынын еске салды. Табылған заттарды иесіне қайтару немесе жақын маңдағы полиция бөліміне тапсыру қажет.
Бұған дейін «Курсив» Жетісу тұрғыны жарты миллион теңгеге шоколад ұрлағанын хабарлаған.