Қытайлық зерттеушілер ұшқышсыз авиация саласында серпіліс жасап, дрондарды ұшу кезінде сымсыз зарядтайтын жеңіл жүйе әзірледі. Бұл технология ұшқышсыз аппараттарға іс жүзінде шексіз уақыт әуеде қалуға мүмкіндік береді, деп хабарлайды infohub.kz сайты.
Цзяньхуа Хань бастаған Қытай Азаматтық авиация университетінің ғалымдары лазер сәулесін электр энергиясына айналдыратын гибридті қабылдағыш жасады. Құрылғы перовскитті лазерлік элемент пен термоэлектрлік модульді біріктіреді: біріншісі лазер жарығын тікелей токқа айналдырса, екіншісі қызған және салқындатылған жақтар арасындағы температура айырмашылығын пайдаланып қосымша энергия өндіреді.
Зертханалық сынақтар кезінде жүйе 38,49% тиімділік көрсетіп, дрон макетінің винтін айналдыра алды. Қызып кетуді болдырмау үшін әзірлеушілер сурьма селенидінің нанокристалдарын қосып, аппарат қанатының ішіне арнайы салқындату арналарын жобалады.
Дегенмен, технологияны коммерциялық қолданысқа енгізер алдында нақты жағдайда қозғалып жатқан ұшу аппаратын лазер сәулесімен дәл бақылау мәселесін шешу қажет. Зерттеу нәтижелері Matter & Light журналында жарияланды.