Жетісуда логистикалық компания ұлттық және шетел валютасын репатриациялау талаптарын бұзғаны үшін әкімшілік айыппұл 262,6 млн теңгеге дейін ұлғайтылды. Прокуратура араласқаннан кейін бюджетке қосымша 55,7 млн теңге өндірілді, деп хабарлайды infohub.kz сайты.
Облыс прокуратурасының баспасөз қызметінің мәліметінше, бұл халықаралық мультимодальды логистикамен айналысатын акционерлік қоғамның филиалы туралы болып отыр. Компания Қазақстан Республикасы Әкімшілік құқық бұзушылық туралы кодексінің 251-бабының 2-тармағына сәйкес әкімшілік жауапкершілікке тартылды.
Бастапқыда Панфилов аудандық соты филиалға 206,9 млн теңге көлемінде айыппұл салған болатын. Алайда Панфилов ауданының прокуратурасы жаза тағайындау кезінде сот ӘҚБтК-нің 44-бабының талаптарын толық ескермеді деп есептеп, апелляциялық өтінішхат берді.
«Апелляциялық сатыдағы сот прокуратураның ұстанымын қолдап, айыппұл сомасын 262,6 млн теңгеге дейін ұлғайтты. Осылайша, прокурорлық ықпал ету шараларының арқасында мемлекет кірісіне қосымша 55,7 млн теңге өндірілуі қамтамасыз етілді», — деп хабарлады қадағалау органы.
Қазіргі уақытта компания әкімшілік айыппұлды толық төледі. Бюджетке 262,6 млн теңге түсті.
Бұған дейін «Курсив» «Қарағанды су» ЖШС лас ағынды сулар үшін 10 млн теңгеге жуық айыппұл салынғанын хабарлаған болатын.