Алматы облысы Қарасай ауданындағы Жібек жолы ауылында 200 орынға арналған жаңа мәдениет үйінің ашылуы өтті. Нысанның құрылысына 658 млн теңге бөлінді, деп хабарлайды infohub.kz.
Жаңа ғимаратта көрермендер залы, сахна және шығармашылық үйірмелерге арналған кабинеттер жабдықталған. Мұнда концерттер мен театр қойылымдары өткізіліп, домбыра, жыр-терме, вокал, би және қолданбалы өнер үйірмелері жұмыс істейтін болады.
Сонымен қатар, мәдениет үйінің базасында ақындарға арналған «Шежіре» тәлімгерлік орталығы мен үлкен буын ансамблі құрылады. Бұл алаң балалар мен жастардың шұғылдануына және ұлттық дәстүрлерді сақтауға ықпал етеді деп күтілуде.
Соңғы төрт жылда Алматы облысының мәдени инфрақұрылымын дамытуға 52,6 млрд теңге бағытталды. Осы уақыт ішінде 10 жаңа мәдени нысан салынып, тағы 19 мәдениет үйі жөнделді.
Бұл ретте жұмыстар жалғасуда. Жамбыл ауданындағы Қарғалы және Іле ауданындағы Боралдай елді мекендерінде мәдениет үйлері салынуда. Ағымдағы жылы Жамбыл ауданының Шиен ауылындағы нысанның құрылысы да аяқталды.