Халықаралық Moody's рейтинг агенттігі Қазақстанның егеменді кредиттік рейтингін «Baa1» деңгейінде «Тұрақты» болжаммен растады. Бұл туралы Қазақстан Республикасының Ұлттық экономика министрлігі хабарлады, деп жазады infohub.kz сайты.
Агенттіктің шешімі елдің мықты фискалдық ұстанымын көрсетеді. Оны мемлекеттік қарыздың төмен деңгейі, оған қызмет көрсету қабілетінің жоғарылығы және жинақталған валюталық активтер қолдап отыр. Moody's бағамы бойынша, мұның бәрі Қазақстанға экономикалық саясатта икемділік пен сыртқы экономикалық шоктардың салдарын жұмсартуға берік қор береді.
Мұнай өндіру азайғанына қарамастан, ел экономикасы өсуін жалғастырып отыр. Өңдеу өнеркәсібі, құрылыс, көлік және басқа да мұнайға қатысы жоқ секторлар өсімнің қозғаушы күшіне айналды.
Moody's цифрлық, көлік және энергетикалық инфрақұрылымға салынатын инвестициялар орта мерзімді экономикалық өсуді қолдап, экономика құрылымының күрделілігін арттыра беретінін күтеді. Агенттіктің болжамынша, өсудің негізгі драйверлері шикізаттық емес салалар болып қала береді.
Агенттік сондай-ақ салық реформалары бюджеттің мұнайға қатысы жоқ кіріс базасын кеңейту арқылы фискалдық тұрақтылықты нығайтады деп есептейді. Экономиканы одан әрі әртараптандыру салық реформасымен және инфрақұрылымдық инвестициялармен қатар, Moody's бағамы бойынша, фискалдық перспективалар мен экономикалық өсу мүмкіндіктерін жақсартады.
Бұған дейін «Курсив» S&P Global Ratings Қазақстанның банк жүйесінің салалық бағасын «7»-ден «6»-ға көтеріп, «экономикалық тәуекел» компоненті бойынша болжамды «Тұрақтыдан» «Позитивке» өзгерткенін жазған. Қайта қараудан кейін Банк ЦентрКредиттің ұзақ мерзімді рейтингі «BB+»-ке дейін өсіп, Halyk Bank, Нұрбанк және Freedom рейтингтері бойынша болжамдар позитивті болды.