Ұлттық статистика бюросының жаңа деректеріне сәйкес, Қазақстандағы орташа жалақы 2026 жылдың екінші тоқсанының қорытындысы бойынша тарихи максимумға — 486 388 теңгеге жетті. Алайда, жылдық көрсеткіште 10,3% құраған инфляция салдарынан орташа жалақының нақты сатып алу қабілеті 1,9%-ға төмендеді... деп хабарлайды infohub.kz сайты.
Тоқсан ішінде номиналды өсім 5,4%-ды, ал жыл ішінде 8,4%-ды құрады. Дегенмен, нақты көрсеткіш, яғни баға өсімін ескере отырып, теріс болып шықты. Маусым айында тауарлар мен қызметтердің қымбаттауы жылдық көрсеткіште 10,3%-ға жетіп, нақты жалақының 1,8%-ға төмендеуіне әкелді.
Статистика қамтыған 15 экономикалық қызмет түрінің барлығында номиналды өсім тіркелді. Алайда инфляциядан асатын нақты өсім тек алты секторда байқалады. Көшбасшы — ауыл, орман және балық шаруашылығы, мұнда нақты өсім жылдық көрсеткіште 6,4% құрады. Бұл ретте орташа жалақы 365 262 теңгені құрап, оң динамикасы бар секторлар арасында ең төменгі көрсеткіш болды. Осы сектор ішінде барлық салалар сенімді өсім көрсетті: өсімдік шаруашылығы мен мал шаруашылығы (+6,5%), орман шаруашылығы мен ағаш дайындау (+6,9%), ал балық аулау және балық өсіру әсерлі +11,7% көрсетті.
Сондай-ақ құрылыста (+5,9%, орташа жалақы — 573 110 теңге) және қаржы секторы мен сақтандыруда (+5,1%, орташа жалақы — 1 107 576 теңге) нақты жалақының айтарлықтай өсімі байқалды. Қаржы секторында қаржылық қызметтер мен сақтандыру саласындағы көмекші қызмет 25,5%-ға өсіп ерекше көзге түсті, ал сақтандыру, қайта сақтандыру және зейнетақымен қамтамасыз ету (міндетті әлеуметтік сақтандырудан басқа) қызметкерлерінің жалақысы, керісінше, 6,8%-ға төмендеді.
Инфляциядан сәл ғана асып, тоқсанды жылжымайтын мүлікпен операциялар (+1,8%), өзге де қызмет түрлері (+1,7%), көтерме және бөлшек сауда, сондай-ақ автомобильдер мен мотоциклдерді жөндеу (+1,5%) және өнеркәсіп (+0,9%) аяқтады.
Қалған тоғыз экономикалық қызмет түрі номиналды өсім көрсеткенімен, нақты көрсеткіште сатып алу қабілетінің бір бөлігін жоғалтты. Ең үлкен шығынды білім беру қызметкерлері көрді: нақты төмендеу 6,5% құрады, ал номиналды өсім небәрі 3,2% болды. Бұл саладағы орташа жалақы — 385 725 теңге. Орта білім беру (-8,1%) және бастауыш білім беру (-8%) қызметкерлерінің табысы айтарлықтай төмендеді.
Аутсайдерлер қатарында өнер, ойын-сауық және демалыс саласы (-6,3%, орташа жалақы — 312 136 теңге), ақпарат және байланыс (-6%, орташа жалақы — 851 076 теңге) да бар. Ақпараттық секторда тек баспа қызметі (+2,7%, орташа жалақы — 728 130 теңге) және кино, бейне, телебағдарламалар, музыка мен дыбыс жазуды өндіру (+91,8%, орташа жалақы — 770 257 теңге) оң динамика көрсетті.
Кәсіби, ғылыми және техникалық қызмет те инфляцияны әле алмады: нақты төмендеу 5% құрады, орташа жалақы 655 277 теңге. Тек құқық және бухгалтерлік есеп саласындағы қызметкерлер (+0,9%, орташа жалақы — 751 200 теңге) мен кәсіби, ғылыми және техникалық сала мамандары (+3,7%, орташа жалақы — 571 412 теңге) оң көрсеткішке ие болды.
Осылайша, Ұлттық статистика бюросының есебінде ұсынылған экономикалық қызмет түрлерінің жартысынан көбі Қазақстанда нақты жалақының өсу қарқыны инфляциядан артта қалғанын көрсетті.