Непалдағы қатты су тасқынынан зардап шеккен аймақтарда құтқарушылар жағадан шыққан көлге байланысты жұмысты тоқтатуға мәжбүр болды, деп хабарлайды infohub.kz сайты.
Қытай мен Непал билігінің мәліметінше, Непал-Тибет шекарасындағы көшкіннен пайда болған көл жағадан шыға бастаған. Бұл екі күн бұрын кенеттен болған су тасқынынан зардап шеккен аудандарға қауіп төндіруде. Осыған байланысты билік құтқару жұмыстарын уақытша тоқтатуға мәжбүр болды.
Тибетпен шекаралас Непалдың Расува ауданының тұрғындары өзен деңгейінің көтерілуінен қашып, төбелерге қарай ұмтылды. Непал билігі құтқару жұмыстарын кемінде 90 минутқа тоқтатқаны айтылады.
Сонымен қатар, көлдегі бөгеттің жарылу қаупіне байланысты барлық қытайлық құтқарушылар мен техника қауіпсіз аймаққа эвакуацияланды.
Көл сәрсенбіде Тибеттегі Гиронг өткеліне лай мен қоқыс қабырғасы құлағаннан кейін пайда болып, су тасқынын тудырды.
Жұма күні Непалдағы мұздықтың опырылуы салдарынан қаза тапқандар саны 469-ға жеткені расталды, тағы 1300-ден астам адам Непал мен Тибетте хабар-ошарсыз кеткен.
Еске салайық, бұған дейін Қытай мен Непал арасындағы өткел маңында көшкін жүргені белгілі болған еді. Бұл жол қозғалысына, байланыс пен электрмен жабдықтауға әсер етті. Кейін мыңдаған адам хабар-ошарсыз кеткен қатты су тасқыны туралы хабарланды. Ірі тасқынның себебі жер сілкінісі мен одан кейінгі көшкін деп аталды.
Осыдан кейін Қазақстан СІМ азаматтарымыз туралы алғашқы мәліметтерді жариялады. 27 тамызда туристік топ құрамында Қытайдан Непалға өткен қазақстандық туристі іздеу басталғаны белгілі болды. Бүгін СІМ тағы бір қазақстандық әйелді іздеу туралы хабарлады.