Қазақстанда Omoda C5 және C5 Plus кроссоверлеріне көлік түрін мақұлдаудың (ОТТС) жаңа куәлігі берілді. Ал Plus нұсқасы әдеттегі модельден айтарлықтай өзгеше. «Курсив Авто» анықтағандай, бұл — келбеті басқа көлік. Astana Motors танымал модельдің тағы бір нұсқасын шығарып, жергілікті өндіріске қосуға дайындалып жатқан сияқты, деп хабарлайды infohub.kz сайты.
Қазақстан жолдарында жиі кездесетін қазіргі Omoda C5 көзге таныс: купе тәрізді шанақ, өзіне тән алдыңғы бөлігі және шағындау өлшемдері. Ал жаңа C5 Plus басқа келбетке ие болып, неғұрлым жаңа буын модель ретінде қабылданады.
Жаңа ОТТС деректеріне сәйкес, көліктің ұзындығы — 4545 мм, ені — 1824 мм, биіктігі — 1588 мм, дөңгелек базасы — 2630 мм. Қозғалтқыш қақпағының астында қуаты 108 кВт, айналдыру моменті 210 Нм болатын 1,5 литрлік TCI турбомотор орнатылған, ол алдыңғы жетекпен жұмыс істейді.
Сонымен қатар OMODA & JAECOO Қазақстанның ресми сайты C5 PLUS-ты модель қатарына қосып, «Жақында сатылымға шығады» мәртебесін беріп қойды.
Салон да қазіргі C5-тен айтарлықтай өзгешеленеді. Жаңа көлікте 2K ажыратымдылықтағы 15,6 дюймдік орталық экран, 8,88 дюймдік цифрлық аспаптар тақтасы және Qualcomm Snapdragon 8155 платформасы ұсынылған. Сондай-ақ Apple CarPlay мен Android Auto, жоғары нұсқада қуаты 50 Вт сымсыз қуаттағыш және 540 градустық айнала шолу жүйесі бар.
Omoda C5 Plus қос іліністі 6-сатылы роботты, ECO және SPORT режимдерін, сондай-ақ электронды ассистенттер жиынтығын алды. Жинақтамаға қарай 17 немесе 18 дюймдік дөңгелектер, төрт немесе алты қауіпсіздік жастықшасы, алдыңғы орындықтарды желдету және екі аймақтық климат-бақылау қолжетімді болады.
Ресми деректер бойынша, 100 км/сағ-қа дейін жүгіріп алу 9,9 секунд алады, ең жоғары жылдамдығы — 180 км/сағ, ал жарияланған отын шығыны 100 км-ге 7,3 л құрайды.
Сатылымның нақты басталу күні әзірге белгісіз. Алайда C5 PLUS-тың жаңа қазақстандық ОТТС-те пайда болуы модельдің жергілікті нарыққа дайындалып жатқанын көрсетеді.
Оның үстіне құжаттарда өндіруші әрі өтініш беруші ретінде Astana Motors Manufacturing Kazakhstan көрсетілген. Бұл модельдің Алматыдағы көпбрендті зауытта шығарылатынын білдіреді.
Бұған дейін «Курсив Авто» Jaecoo J5 және J7 PHEV Алматыда құрастыру үшін ОТТС алғанын жазған болатын.