Павлодар облысында ауыр жол-көлік оқиғасы болып, салдарынан тоғыз адам, оның ішінде алты бала зардап шекті. Оқиға 31 шілде мен 1 тамыз аралығындағы түнде Екібастұз – Павлодар тас жолында болған. Жеңіл көліктің жүргізушісі рульге ие бола алмай, арыққа аударылып кеткен, деп хабарлайды infohub.kz сайты.
Pavlodarnews.kz басылымының мәліметінше, оқиға орнына үш жедел жәрдем бригадасы шұғыл жеткен. Жол апатынан тоғыз адам зардап шеккен: үш ересек және алты бала. Бір ер адам медициналық тексеруден бас тартқан, қалғандары – әйел, ер адам, екі ұл және төрт қыз – әртүрлі жарақаттармен Екібастұз қалалық ауруханасына жатқызылған.
Кейін үш бала мен ересектер тексеруден өтіп, амбулаториялық емге жіберілген. Алайда 11 жасар бала реанимацияға түсіп, дәрігерлер оған жабық бас-ми жарақатын, кеуде қуысының жабық жарақатын және көптеген сызаттарды анықтаған. Баланың жағдайы тұрақталған соң, оны травматология бөлімшесіне ауыстырған. Оның жағдайы орташа ауырлық дәрежесінде деп бағалануда.