Петропавлда инклюзивті орталық салып жатқан жұмысшылар жерден адам сүйектерін шығарып жатыр. Қазба жұмыстары кезінде топырақ астынан сүйектер, бас сүйектер, ағаш табыттардың сынықтары, шегелер мен кресттер шығуда. Кейбір қаңқалар толық дерлік сақталған, ал куәгерлердің айтуынша, табылғандар арасында балалардың сүйектері де кездеседі, деп хабарлайды infohub.kz сайты.
Бейнежазбалардың бірінде экскаватор жүргізушісі жұмысшылар бірнеше табыт тапқанын айтады. Табылған сүйектерді олар қолмен жинап, қаптарға салып жатыр.
«Бүгін кездейсоқ табытты ашып қойдым. Ол жалғыз емес. Менің көмегіммен жігіттер бесінші табытты алып жатыр. Құдайым, кешір. Сүйекке толы қап. Мұнда табыт үстіне табыт. Бір күнде сонша қап жинадық. Жігіттер мұның бәрін қолмен істеп жатыр. Сүйек таптым, бас сүйек, бас сүйек таптым. Түс көрмес үшін бүгін ішу керек», — дейді кран жүргізушісі өз бейнежазбасында.
Halyqstan Telegram-арнасы жазғандай, бір ғасырдан астам уақыт бұрын бұл жерде христиан зираты болған. Кейінірек мұнда жас натуралистер станциясы жұмыс істеген. Бұл аумақта сүйектер бұрын да табылған.
Солтүстік Қазақстан облысы полиция департаменті «Курсивке» полиция тексеру бастағанын хабарлады.
«Скелеттелген сүйектер табылған факті бойынша полиция материал тіркеді. Қылмыстық сипат белгілері анықталған жоқ. Сүйектердің шығу тегін және табылуының өзге де мән-жайларын анықтау үшін тексеру тағайындалды. Түпкілікті қорытынды оның нәтижелері бойынша жасалады», — деді полицияда.
Бұған дейін Петропавлда ескі зират орнында құрылыс кезінде адам сүйектері табылғаны хабарланған.