Қарағандыда емхананың бұрынғы бас бухгалтері жұмыстан шығарылғаннан кейін қызметіне қайтарылды: сот еңбек шартын бұзуға негіз болған тәртіптік жазалардың заңбұзушылықтармен қолданылғанын анықтады, деп хабарлайды infohub.kz сайты.
Қарағанды облысы соттарының ресми Telegram-арнасында хабарланғандай, Қарағандының Қазыбек би ауданының №2 соты бұрынғы бас бухгалтердің емханаға қойған талап-арызы бойынша азаматтық істі қарады. Талап қоюшы тәртіптік жаза қолдану және еңбек шартын бұзу туралы бұйрықтарды заңсыз деп тануды, қызметіне қайта орналастыруды, мәжбүрлі бос жүрген уақыты үшін жалақы мен моральдық зиянды өтеуді сұрады.
Сот талқылауы барысында жұмыс берушінің бұйрығымен талап қоюшымен еңбек шарты Қазақстан Республикасы Еңбек кодексінің 52-бабы 1-тармағының 16-тармақшасының негізінде — тәртіптік жазасы бар кезде дәлелді себепсіз еңбек міндеттерін қайталап орындамағаны немесе тиісінше орындамағаны үшін бұзылғаны анықталды.
Сот жұмыс беруші жұмыстан шығаруға негіз ретінде сілтеме жасаған тәртіптік жазалар еңбек заңнамасының талаптарын бұза отырып қолданылғанын анықтады. Атап айтқанда, талап қоюшыны тәртіптік жауапкершілікке тарту мәселесін қарау кезінде тәртіптік комиссия отырысы қажетті кворумсыз өткізілген, бұл тәртіптік жаза қолданудың белгіленген тәртібінің сақталмағанын көрсетеді.
Сонымен қатар, тәртіптік жаза Еңбек кодексінің 66-бабында көзделген мерзімді бұза отырып салынған, оған сәйкес тәртіптік жаза теріс қылық анықталған күннен бастап бір айдан кешіктірілмей салынады.
Қазақстан Республикасы Жоғарғы Сотының «Соттардың еңбек дауларын шешу кезінде заңнаманы қолдануының кейбір мәселелері туралы» нормативтік қаулысының 18-тармағына сәйкес, Еңбек кодексінің 52-бабы 1-тармағының 16-тармақшасында көзделген негіз бойынша жұмыстан шығарылған адамды қызметіне қайта орналастыру туралы талаптарды қарау кезінде сот қызметкердің бұрын тәртіптік теріс қылық жасағанын, оны тәртіптік жауапкершілікке тарту тәртібі мен мерзімдерінің сақталғанын, сондай-ақ дәлелді себепсіз еңбек міндеттерін орындамаудың немесе тиісінше орындамаудың қайталану белгісінің бар-жоғын анықтауы қажет.
Сот талап қоюшыға бұрын қолданылған тәртіптік жазаларды заңсыз деп танып, жұмыстан шығару үшін көзделген құқықтық негіздердің жоқтығы туралы қорытындыға келді.
Сот шешімімен талап қоюшыны тәртіптік жауапкершілікке тарту және еңбек шартын бұзу туралы бұйрықтар күші жойылды. Талап қоюшы бас бухгалтер қызметіне қайта орналастырылды. Оның пайдасына мәжбүрлі бос жүрген уақыты үшін жалақы, моральдық зиянды өтеу және сот шығыстары өндірілді. Сот шешімі заңды күшіне енді.