Жақында тағайындалған Қазақстанның Қорғаныс министрі Айдос Мырзахметов Ақмола гарнизонындағы әскери бөлімдердің біріне кенеттен барды, деп хабарлайды infohub.kz сайты.
Қорғаныс министрлігінің мәліметінше, ведомство басшысы әскери қызметтің ұйымдастырылуымен және әскери қызметшілердің тұрмыстық жағдайымен танысты. Тексеру барысында казарма қорының жай-күйіне және бөлім инфрақұрылымына ерекше назар аударылды.
Жарияланған кадрларға қарағанда, министр әскери бөлімнің асханасы мен оқу кабинеттерін аралап, төсек-орындардың жай-күйін және әскери қызметшілердің тұрмысының ұйымдастырылуын тексерді. Генерал-майор мерзімді қызметтегі сарбаздармен жеке әңгімелесті.
Сапар қорытындысы бойынша өмір сүру жағдайларын жақсарту жөнінде нақты тапсырмалар берілді.
Еске салайық, жақында Қазақстанның қорғаныс ведомствосы басшылығында кадрлық өзгерістер болды. Дәурен Қосанов қорғаныс министрі қызметінен босатылып, оның орнына Айдос Мырзахметов тағайындалды.
Бұл Қазақстан Президенті Қасым-Жомарт Тоқаев Маңғыстауда әскери қызметшілердің қаза табуынан кейін Қазақстанның Қорғаныс министрлігіндегі істердің жай-күйін кешенді тексеру жөніндегі комиссия құру туралы өкімге қол қойғаннан кейін орын алды.
24 қыркүйекте оқу-жауынгерлік тапсырманы орындау барысында ауа райының кенеттен нашарлауы мен екпінді желдің салдарынан Каспий теңізіне 17 әскери қызметші ағып кетті, олардың 14-і қаза тапты. Үшеуі аман қалды.