Қазақстан премьер-министрі Олжас Бектенов үкімет отырысында жылу маусымы белгіленген мерзімде басталуы тиіс екенін айтып, бірқатар тапсырма берді, деп хабарлайды infohub.kz сайты.
«Энергия кәсіпорындарының жылу маусымына дайындығы бойынша паспорттар алу жұмыстары басталды. Әкімдерге энергия нысандарының қысқа дайындығын бағалау жөніндегі комиссиялардың жұмысына жеке қатысуды тапсырамын. (…) Егер жылу маусымына дайындық паспортынсыз кірсе, тиісті басшылар жауапкершілікке тартылады», — деді Олжас Бектенов.
«Самұрық-Энерго» компаниясына премьер жөндеу жұмыстарын уақытылы аяқтап қана қоймай, жаңа қуаттарды пайдалануға беруді де тапсырды. KEGOC компаниясына — желілер мен қосалқы станцияларды жөндеу кестесін сақтауды.
Энергетика министрлігі мен әкімдіктерге премьер 1 қыркүйекке дейін өңірлерге әлеуметтік мазут жеткізу кестесін бекітуді тапсырды. ҚТЖ-мен бірлесіп, бекітілген кесте мен көлемдерге сәйкес энергия нысандарына көмір мен мазутты уақтылы жеткізу шараларын қабылдау қажет.
«Халықты және коммуналдық-тұрмыстық секторды көмірмен уақтылы қамтамасыз ету мәселесін ерекше атап өтемін. Көмірді өндіру мен тиеуден бастап, халыққа сатуға дейінгі бүкіл тізбекті қатаң бақылау қажет. Өңірлерде үзілістерге, бағаның негізсіз өсуіне және жасанды ажиотажға жол бермеу керек», — деді Бектенов.
Артта қалған әкімдерге премьер бар проблемаларды жедел жоюды тапсырды.
«Өнеркәсіп және құрылыс министрлігіне, өңірлердің әкімдіктеріне 1 қыркүйекке дейін білім беру және денсаулық сақтау нысандарының толық дайындығын қамтамасыз етуді тапсырамын. Ағарту, ғылым және денсаулық сақтау министрліктері де бұл мәселені бақылауға алсын.
Солтүстік, орталық және шығыс өңірлер бойынша барлық инженерлік инфрақұрылым мен тұрғын үй-коммуналдық шаруашылық нысандары 15 қыркүйекке дейін, ал қалған өңірлерде 15 қазанға дейін жылу беруге толық дайын болуы тиіс», — деді Бектенов.
Сонымен қатар, премьер-министр жылу маусымы қарсаңында энергия нысандарын жөндеудің бұзылуына жол берген басшыларды жазалауды тапсырды.