Қытай билігі Папуа — Жаңа Гвинеяда коммерциялық жүк контейнерінен Қытайда жасалған деп күдіктелген артиллериялық снаряд табылды деген хабарды жоққа шығарып, оны «снаряд пішінді шарап бөтелкесі» деп мәлімдеді, деп хабарлайды infohub.kz сайты.
«Оның ешқандай қауіпі жоқ», — деп жазды Қытай елшілігі сейсенбі күні «Фейсбук» парақшасында. Алайда бұл мәлімдеме күмән тудырған пікірлерге ұласты.
Порт-Морсби полициясы өткен жұма күні астанадағы құрылыс алаңынан салмағы 32 келі нысан табылған соң төрт Қытай азаматын ұстаған болатын. Жергілікті бұқаралық ақпарат құралдарының сол кездегі хабарлауынша, билік нысанның белсенді құрылғы екенін анықтауға кіріскен, ал полиция комиссары Дэвид Мэннинг оны «аса алаңдатарлық жағдай» деп сипаттаған.
Сәрсенбі күні Австралиялық телерадио корпорациясы өз ақпарат көздеріне сілтеме жасай отырып, нысан химиялық жарылғыш зат пен тұтандырғышы бар, жарылмаған 130 миллиметрлік қытайлық 59-типті артиллериялық снаряд екенін анықтағанын хабарлады. Би-би-си бұл ақпаратты тәуелсіз түрде растаған жоқ.
Жергілікті «Пост Курьер» газетінің жазуынша, Папуа — Жаңа Гвинея полициясы нысан «жай ғана макет» деген болжамды бұған дейін жоққа шығарған.
Алайда Қытай елшілігі өз мәлімдемесінде заңсыз әскери деңгейдегі артиллериялық снарядтың Қытайдан Папуа — Жаңа Гвинеяға заңсыз жеткізілуі «іс жүзінде мүмкін емес» екенін айтты.
«Қытай әлемдегі ең қатаң атыс қаруын бақылау заңдары мен ережелерінің бірін қолданады», — делінген хабарламада. Онда Қытай «әлемдегі ең қауіпсіз елдердің бірі ретінде кеңінен танылғаны» да қоса айтылған.
Алайда кейбір «Фейсбук» қолданушылары бұған сенер емес. «Қандай шарап бөтелкесі 32 келі тартады?» — деп жазды біреуі. Тағы бір қолданушы нысанда оның шарап бөтелкесі екенін білдіретін ешқандай жапсырма жоқ екенін атап өтті.