Қазақстандық қақпашы Стас Покатилов өнер көрсететін әзірбайжандық «Сабах» футбол клубы Чемпиондар лигасының плей-офф кезеңіндегі алғашқы матчта жеңіліске ұшырады. Кездесу израильдік Беэр-Шева «Хапоэлінің» пайдасына 2:1 есебімен аяқталды, деп хабарлайды infohub.kz сайты.
Матч Бухаресттегі бейтарап алаңда, «Джулешти - Валентин Станеску» стадионында өтті. Номиналды қожайындар — израильдіктер ерікті жеңіске жетті. 6-минутта-ақ «Сабахтың» сербиялық шабуылшысы Велько Шимич өз командасын алға шығарды. Алайда үзіліске дейін, 43-минутта, «Хапоэльдің» ямайкалық вингері Джейвон Ист тепе-теңдікті қалпына келтірді. 79-минутта сербиялық форвард Игор Златанович жеңіс голын соқты.
Қазақстандық қақпашы Стас Покатилов «Сабахтың» негізгі құрамында алаңға шығып, барлық 90 минутты капитандық белгімен өткізді. Ол үш сейв жасады. Бұған дейін Покатилов Қазақстан ұлттық құрамасының алдағы Ұлттар лигасы матчтарына кеңейтілген тізіміне енгізілген болатын.
«Сабах» пен «Хапоэль» арасындағы жауап матч 25 тамызда Бакуде өтеді. Екі кездесу қорытындысы бойынша жеңімпаз Чемпиондар лигасының жалпы кезеңіне шығады, ал жеңілген команда Еуропа лигасының негізгі турнирінде жалғастырады.
Чемпиондар лигасының плей-офф кезеңіндегі басқа алғашқы матчтардың нәтижелері:
«Динамо Загреб» (Хорватия) — «Викинг» (Норвегия) — 2:2.
«Левски» (Болгария) — АЕК (Греция) — 0:0.
«Фенербахче» (Түркия) — «Лион» (Франция) — 1:1.
НЕК (Нидерланд) — «Буде-Глимт» (Норвегия) — 1:3.
«Селтик» (Шотландия) — ЛАСК (Австрия) — 3:0.
«Хапоэль Беэр-Шева» (Израиль) — «Сабах» (Әзірбайжан) — 2:1.
«Слован» (Словакия) — «Целе» (Словения) — 1:1.