Қазақстандық UFC өкілі Шавкат Рахмоновтың жаттықтырушысы Эдуард Базров спортшының денсаулық жағдайына байланысты 2026 жылы октагонға орала алмайтынын мәлімдеді, деп хабарлайды infohub.kz.
Базровтың айтуынша, Рахмоновтың жағдайы толыққанды дайындық жүргізуге мүмкіндік бермейді. Алайда дәрігерлер жаттығуларға қатысуға тыйым салмайды және оңалту барысына оң болжам жасайды. «Қазір Шавкат аяғын қалпына келтіріп жатыр, күніне бір рет жаттығады. Біз дене шынықтыру және бокс бойынша қазіргі мүмкіндіктерімізді пайдаланып жаттығулар жасаймыз. Оның нақты оралу мерзімін дәл айта алмаймыз. Өйткені жарақаттан кейін әркім әртүрлі қалпына келеді. Менің ойымша, келесі жылы. Менің пайымдауымша, 2027 жылдың ақпанында ол жекпе-жекке толық дайын болуы мүмкін, бірақ Шавкат Рахмоновтың қашан толық сауығатынын дәл айту әлі мүмкін емес», – деді Эдуард Базров.
Жаттықтырушының сөзінше, Рахмонов сауыққаннан кейін оған бірден топ қарсылас тағайындалады, өйткені жарақат алған кезде қазақстандық UFC-дің жартылай орта салмақ дәрежесіндегі рейтингте екінші орында тұр еді. Еске салайық, мамыр айының соңында Шавкат Рахмонов ұзақ үзілістен кейін жаттығу процесіне оралғаны белгілі болды. Рахмоновтың соңғы жекпе-жегі 2024 жылдың желтоқсанында UFC 310 турнирінде өтіп, онда ирландиялық Иэн Мачадо Гэрриді бірауыздан шешіммен жеңіп, рекордын сақтап қалды — 19–0. Осыдан кейін ол денсаулық проблемаларына байланысты октагонға ұзақ уақыт шықпай, UFC-дің жартылай орта салмақ рейтингінің алдыңғы қатарынан шығып қалды.