Шымкент әуежайында мас жолаушы өз жүгінде жарылғыш құрылғы бар деп мәлімдеп, рейстен түсіріліп, бес тәулікке әкімшілік қамауға алынды, деп хабарлайды infohub.kz сайты.
NUR.KZ-тің Polisia.kz-ке сілтеме жасап хабарлауынша, оқиға Шымкент — Астана рейсіне тіркелу кезінде болған. Ішімдік ішкен ер адам жүгінде «жарылғыш құрылғы» бар екенін айтқан.
Әуекомпания өкілдері жолаушыны дереу рейстен түсіріп, көліктегі полиция бөлімінің қызметкерлеріне тапсырды. Тексеру барысында көлік полицейлері ақпараттың расталмағанын анықтады — ешқандай жарылғыш құрылғы табылған жоқ. Әуежайда эвакуация жүргізілген жоқ.
Тексеру қорытындысы бойынша ер адам қоғамдық орында мас күйінде жүру және ұсақ бұзақылық жасағаны үшін жауапкершілікке тартылды. Сот шешімімен оған 5 тәулік әкімшілік қамау тағайындалды.
«Әуежайлар мен көлік нысандарында жарылғыш құрылғылар мен өзге де қауіпсіздікке төнетін қатерлер туралы әзілдесу — әзілдесуге негіз емес. Адам зиян келтіруді ойламаған болса да, мұндай мәлімдемені «әзілге» айтса да, ондай сөздер заңда белгіленген тәртіппен қаралып, жауапкершілікке әкеп соғады», — делінген хабарламада.