Шымкентте тұтынушы TikTok әлеуметтік желісі арқылы сатып алынған балалар бесігі мен «Бесік жасауы» жинағы үшін 125 мың теңгені қайтарып алды, деп хабарлайды infohub.kz сайты.
Қазақстан Республикасы Сауда және интеграция министрлігінің Тұтынушылар құқығын қорғау комитетінің ресми сайтында мәлім болғандай, тауар жеткізіліп, оны қарап шыққаннан кейін сатып алушы жинақтың мәлімделген талаптар мен сипаттамаларға сай келмейтінін анықтады.
Тауар пайдаланылмаған: оның сыртқы түрі, қаптамасы және заттаңбалары сақталған. Осыған байланысты тұтынушы сатушыға жағдайды реттеуді және төленген ақшаны қайтаруды талап етіп жүгінді. Алайда сатушы ақшаны қайтармады.
Өзінің заңды құқықтары мен мүдделерін қорғау үшін тұтынушы Шымкент қаласы бойынша Сауда және тұтынушылар құқығын қорғау департаментіне жүгінді.
Мамандар тұтынушыға тұтынушылар құқығын қорғау саласындағы заңнама талаптарын түсіндіріп, сатушыға шағым дайындауға көмек көрсетті.
Шағым жіберілгеннен кейін тұтынушының талаптары қанағаттандырылды. «Бесік жасауы» жинағы үшін төленген 125 мың теңге толық көлемде қайтарылды.