Rollme компаниясы View сериясындағы ақылды көзілдіріктерді ұсынды. Олар 12 мегапиксельді Sony камерасымен, дауыстық жасанды интеллект көмекшісімен және сөйлесуді нақты уақытта аудару функциясымен жабдықталған. Құрылғының бағасы небәрі $100 (шамамен 45 мың теңге), бұл оны кең аудиторияға қолжетімді етеді. Бұл көзілдіріктердің қандай мүмкіндіктері бар және өндірушіге төмен бағаны сақтауға не көмектесті — Kursiv LifeStyle айтады.
Серияға екі модель кіреді — AuraView және ProView. Екеуі де футуристік гаджеттен гөрі қарапайым көзілдірікке ұқсайды. Оправаға Sony IMX386 камерасы орнатылған, ол бірінші адамнан фото және видео түсіруге мүмкіндік береді. Түсіру үшін самайдағы физикалық түймені басу жеткілікті, ал жазба 4 ГБ көлеміндегі кірістірілген жадта сақталады.
Камера тек фотоға ғана емес, сонымен қатар заттар мен көрнекті орындарды тануға, көз алдындағы мәтінді аударуға және сөйлесу кезінде аудармаға көмектеседі. Көзілдірікте ChatGPT сияқты модельдермен жұмыс істейтін дауыстық көмекші де бар.
Дыбысқа самайдағы бағытталған динамиктер жауап береді. Олар құлаққа жақын орналасқандықтан, музыка мен әңгімені қоршаған әлемнен оқшауланбай тыңдауға болады. Смартфонға Bluetooth 5.4 және Wi-Fi 6 арқылы қосылады.
Автономдылықты 280 мА·сыйымдылықтағы аккумулятор қамтамасыз етеді. Өндіруші 10-12 сағат жұмыс істеуге уәде береді, дегенмен белсенді түсіру және аударманы қолдану бұл уақытты айтарлықтай қысқартуы мүмкін.
AuraView металл жартылай жиекті оправамен және қоңыр линзалармен, ал ProView пластик толық жиекті оправамен жабдықталған. Соңғысы тонировкаланған және мөлдір линзалармен бірге келеді.
Бұған дейін Kursiv LifeStyle Meta компаниясы Meta Glasses ақылды көзілдіріктерінің жаңа желісін ұсынғанын жазған. Алдыңғы модельдерден айырмашылығы, жаңа өнім бюджеттік сегментке жатады — бағалары $299-дан (шамамен 150 мың теңге) басталады.