Қазақстан Республикасы Туризм және спорт министрлігі Спорт және дене шынықтыру істері комитеті «Астана» баскетбол клубының қызметін тоқтатуына қатысты ресми мәлімдеме жасады, деп хабарлайды infohub.kz.
Ведомство соңғы жылдары клубтың халықаралық аренадағы нәтижелері қойылған міндеттер мен күткен үміттерге сай болмағанын атап өтті. Өткен маусымда Бірыңғай ВТБ лигасында «Астана» 44 ойынның тек екеуінде жеңіске жетіп, соңғы 12-орынға тұрақтады. Жеңіліс пайызы 95%-дан асты, бұл клубтың лигадағы бүкіл тарихындағы ең нашар көрсеткіш болды. Сонымен қатар, команда сегіз жыл бойы бұл турнирдің плей-офф кезеңіне шыға алмады.
Комитетте сондай-ақ ішкі аренада «Астана» баскетбол клубы да қойылған мақсаттарға жете алмай, Қазақстан Кубогы үшін күресте жеңіліп, Ұлттық лигада чемпион атағын иелене алмағанын қосты.
Ведомство өткен жылы спортты қаржыландыру тиімділігін арттыруды көздейтін Қазақстан Республикасының Заңы қабылданғанын еске салды. Оның негізгі ережелері ұлттық құрама командаларды басым дамытуға, спорт резервін қалыптастыруға, сондай-ақ бюджет қаражаты есебінен легионерлерді қаржыландыруға тыйым салуға бағытталған.
Қалыптасқан жағдайда отандық баскетболды дамыту тәсілдерін қайта қарау мүмкіндігі қарастырылуда. Басымдық жастар командасын дамытуға, спорт резервін дайындауға және балалар мен жасөспірімдер спортын қолдауға беріледі.
Бұған дейін «Астана» кәсіби баскетбол клубының ойыншылары негізгі команданың жабылуы туралы шешімнен кейін мәлімдеме жасаған болатын. Сондай-ақ БАҚ-та клубтың бюджет тапшылығына байланысты Бірыңғай ВТБ лигасында өнер көрсетпейтіні туралы ақпарат пайда болды.