Қазақстандық электроника мен тұрмыстық техника дүкендер желісі Technodom Operator 2026 жылдың үшінші тоқсаны үшін артықшылықты акциялар бойынша дивиденд төлейтінін хабарлады. Төлемнің жалпы сомасы 70,784 млн теңгені құрайды, деп жазады infohub.kz сайты.
Шешім туралы ақпарат Қаржылық есептілік депозитарийінің (ҚЕД) сайтында жарияланды. Бір артықшылықты акцияға шаққандағы дивиденд мөлшері 7 мың теңге деп белгіленді. Төлемдер компанияның орналастырылған 10 112 акциясы бойынша көзделген, қосындысы жарияланған 70,784 млн теңгені береді. Ақша акционерлерге қолма-қол ақшасыз нысанда аударылады.
Technodom Operator акционері — Амстердамда тіркелген TD Retail B.V. компаниясы. Топтың түпкілікті бақылаушы тарапы — Forbes рейтингінде бай қазақстандықтар арасында 52-орында тұрған, қаражаты $197 млн болатын қазақстандық кәсіпкер Эдуард Ким.
2026 жылдың қаңтарында «Курсив» Technodom 2025 жылдың төртінші тоқсаны қорытындысы бойынша дәл осындай соманы — 70,784 млн теңгені — төлеуді жоспарлағанын жазған болатын.
Аудиттелген қаржылық есептілікке сәйкес, 2025 жылы компания артықшылықты акциялар бойынша 283,136 млн теңгеге дивиденд жариялаған, алайда жыл ішінде оларды іс жүзінде төлемеген. 2024 жылы төлемдер 223,852 млн теңгені, ал 2023 жылы 325,605 млн теңгені құраған.
Жаңа дивидендтер Technodom-ның қаржылық нәтижелері нашарлаған тұста жарияланды. «Курсив» жазғандай, 2025 жылдың қорытындысы бойынша топтың түсімі 9,2%-ға қысқарып, 210,9 млрд теңгеге жетті. Таза пайда шамамен он есе азайып — 387,7 млн теңгеден 38 млн теңгеге төмендеді.
Сонымен қатар Technodom бөлшек сауда желісін қысқартты. Дүкендер саны 78-ден 62-ге, ал тапсырыс беру пункттері 57-ден үшеуге азайды. Топ қызметкерлерінің саны 405 адамға қысқарып, 3 528-ге жетті.
Technodom Operator Қазақстан мен Қырғызстанда электроника мен тұрмыстық техниканы көтерме және бөлшек саудалаумен айналысады.