Дат және жапон ғалымдары темекі шегудің және одан бас тартудың кенеттен жүрек өлімі қаупіне ұзақ мерзімді әсерін бағалады, деп хабарлайды infohub.kz.
Ірі зерттеу аясында мамандар Копенгаген жүрек зерттеуіне қатысқан 10 мыңнан астам адамның деректерін талдады. Еріктілердің денсаулық жағдайын бақылау шамамен 29 жылға созылды. Барлық қатысушылар темекі шегу өтілі мен зиянды әдеттен бас тартқаннан кейін өткен уақытқа қарай санаттарға бөлінді.
Нәтижелер көрсеткендей, белсенді темекі шегушілерде кенеттен жүрек өлімінің қаупі ешқашан шекпегендерге қарағанда 88%-ға, ал тастағандарда 34%-ға жоғары болған. Сонымен қатар, темекіні тастағаннан кейін әр жыл сайын көрсеткіштер біртіндеп төмендеген. Никотиннен 26 жылдан 67 жылға дейін бас тартқандарда қауіп темекі шекпегендердің деңгейіне дейін толық теңескен.
Зерттеу авторлары жүрек-қан тамырлары ауруларының қаупі өмір бойы жинақталған никотиннің жалпы мөлшеріне тікелей байланысты екенін атап өтті. Ағзаға келтірілген залал ұзақ сақталады, алайда темекіні уақытында тастау көрсеткіштерді толық қалпына келтіруге және өлім қаупін азайтуға мүмкіндік береді.