Әлемдік мұнай бағасының күрт төмендеуіне қарамастан, қазақстандық теңге долларға қатысты нығайды. Қазақстан қор биржасындағы (KASE) сауда қорытындысы бойынша америкалық валютаның орташа өлшенген бағамы 2,58 теңгеге төмендеп, 473,40 теңгені құрады, деп хабарлайды infohub.kz сайты.
KASE мәліметтері бойынша, доллардың орташа өлшенген бағамы бір күн бұрынғы 475,98 теңгеден 473,76 теңгеге дейін төмендеді. Сауда барысында мәміленің ең төмен бағасы 470,27 теңге, ең жоғарысы – 476,59 теңге болса, жабылу бағамы – 475 теңге. Сауданың жалпы көлемі 433,5 миллион долларға жетіп, 1 246 мәміле жасалды.
Астана және Алматы айырбас пункттерінде кешке қарай америкалық валютаны сатудың ең жоғары бағамы 477 теңгеге жетті.
Ал мұнай нарығы дүйсенбіде қысымға ұшырады. Күн ішінде Brent маркалы мұнайдың бағасы таңертеңгі көтерілістен кейін күрт төмендеп, 6%-дан астамға арзандады. Бағамы барреліне шамамен 87,6 долларға дейін түсті, алайда кейін шығынның бір бөлігі қайтарылды. Астана уақыты бойынша 17:30-да бағам барреліне 90,44 долларға дейін көтерілді, бірақ бұл алдыңғы деңгейден 6,33 долларға немесе 6,54%-ға төмен.
Бүгін Қазақстан мұнайын Каспий құбыр консорциумы (КТК) арқылы экспорттау ұшқышсыз ұшатын аппараттар мен катерлердің шабуылынан кейін қайта жанданғаны белгілі болды. Еске салайық, КТК 20 шілдеде теңіз терминалының жанындағы танкерге ұшқышсыз ұшатын аппарат шабуылдағаннан кейін тиеуді тоқтатқан еді. КТК – Қазақстан мұнайының негізгі экспорттық бағыты, оның үлесіне жалпы экспорттың 80%-дан астамы келеді.