Каспийде 14 әскери қызметшінің өмірін қиған қайғылы оқиғадан кейін Қазақстан Президенті Қасым-Жомарт Тоқаев тағы үш басшыны қызметтен босатты, деп хабарлайды infohub.kz сайты.
Ақорданың мәліметінше, Қаныш Әбубәкіров Қазақстан Республикасы Қорғаныс министрінің бірінші орынбасары — Қазақстан Республикасы Қарулы күштері Бас штабының бастығы қызметінен босатылды. Ол 1977 жылы 12 ақпанда Оңтүстік Қазақстан облысының (қазіргі Түркістан облысы) Түрткүл ауылында дүниеге келген. 2024 жылы 4 қаңтардан бастап Әбубәкіров Қазақстан Республикасы Қорғаныс министрінің тыл және әскери инфрақұрылым жөніндегі орынбасары қызметін атқарды, ал Қазақстан Республикасы Қорғаныс министрінің бірінші орынбасары болып 2026 жылы қаңтарда тағайындалды.
Сонымен қатар Қазақстан Республикасы Қорғаныс министрінің орынбасары қызметінен Алмаз Жұмакеев босатылды. Ол 1970 жылы 6 наурызда Қырғыз КСР-нің Пржевальск қаласында әскери қызметшілер отбасында дүниеге келген. 2022 жылдың наурызынан бүгінге дейін Қазақстан Республикасы Қарулы күштерінің десанттық-шабуылдау әскерлерінің қолбасшысы қызметін атқарды. 2026 жылы наурызда Қасым-Жомарт Тоқаев Алмаз Жұмакеевті Қазақстан Республикасы Қорғаныс министрінің орынбасары етіп тағайындаған болатын.
Сондай-ақ Қазақстан Республикасы Қарулы күштері Әскери-теңіз күштерінің бас қолбасшысы қызметінен Қанат Ниязбеков босатылды. Ол 1-дәрежелі капитан, ал 2025 жылы тамызда Қазақстан Республикасы Қарулы күштері Әскери-теңіз күштерінің бас қолбасшысы болып тағайындалған еді.
Еске салайық, 24 қыркүйекте оқу-жауынгерлік тапсырманы орындау барысында ауа райының кенеттен және күрт нашарлауы мен екпінді желден Каспий теңізіне 17 әскери қызметшіні ағызып әкетті, олардың 14-і қаза тапты. Үшеуі құтқарылды. Қайғылы оқиғадан кейін Дәурен Қосанов Қорғаныс министрі қызметінен босатылды. Оның орнына Айдос Мырзахметов тағайындалды.