Қазақстан Президенті Қасым-Жомарт Тоқаев Қауіпсіздік кеңесі мен оның аппаратының өкілеттігін қайта белгіледі: енді Қауіпсіздік кеңесі елді кибершабуылдардан қорғап, жасанды интеллектіні реттеп, жеке деректердің таралуына тосқауыл қоятын болады, деп хабарлайды infohub.kz сайты.
Тиісті өзгерістер «ҚР Қауіпсіздік кеңесі аппаратының кейбір мәселелері және ҚР Президентінің кейбір актілеріне өзгерістер мен толықтырулар енгізу туралы» жарлықпен бекітілді. Мемлекет басшысы Қауіпсіздік кеңесі төрағасының орынбасарының міндеттер аясын айқындады.
Оның міндеттеріне мыналар кіреді: Қауіпсіздік кеңесі төрағасының актілері мен тапсырмаларының, сондай-ақ ұйым шешімдерінің сөзсіз және толық орындалуын бақылауды ұйымдастыру; мемлекеттік органдардың қызметін үйлестіру; ұлттық қауіпсіздік, қорғаныс қабілеті, заңдылық пен құқық тәртібі саласындағы іс-шараларды ұйымдастыру; Қауіпсіздік кеңесі аппаратының жұмысын үйлестіру.
Сонымен қатар Кеңес төрағасының орынбасары ақпараттық және киберқауіпсіздік, жасанды интеллектіні пайдалану, жеке деректерді қорғау, сыбайлас жемқорлық пен экономикалық қылмысқа қарсы іс-қимыл, сондай-ақ азаматтық қорғаныс мәселелерімен айналысады.
Президент Қауіпсіздік кеңесі аппаратының қызметін де нақтылады. Ол мемлекет басшысына бағынатын дербес орган ретінде көрсетілген.
«Қауіпсіздік кеңесі аппаратының қызметі ұлттық қауіпсіздік саласындағы тәуекелдерді бақылауды күшейту мен жетілдіруге, мемлекеттік басқарудың тұрақтылығын қамтамасыз етуге, институционалдық қолдауға және Кеңес төрағасы мен Қауіпсіздік кеңесінің шешімдерін орындауға бағытталған», — делінген құжатта.
Тоқаевтың пікірінше, осы міндеттерді жүзеге асыру егемендік пен тәуелсіздікті, аумақтық тұтастықты, халықаралық аренадағы ұлттық мүдделерді және конституциялық құрылыс негіздерін қорғауды күшейтуге ықпал етеді.
Бұған дейін «Курсив» Қазақстанның Қауіпсіздік кеңесі аппаратында кадрлық тағайындаулар болғанын жазған еді.