Қазақстан Президенті Қасым-Жомарт Тоқаев Сеулге сапары барысында Оңтүстік Кореяның мемлекеттік және қоғамдық қайраткерлеріне «Достық» орденінің II дәрежесін тапсырды. Марапаттау рәсімі Оңтүстік Корея астанасында өтті, деп хабарлайды infohub.kz сайты.
Іс-шараға қатысушыларға сөз сөйлеген мемлекет басшысы қазақ пен корей халқын әлдеқашан берік достық байланыстырып келе жатқанын атап өтті.
«Елдеріміздің арасы алыс болғанымен, бізді өзара құрмет пен ортақ мүдде жақындастырады. Корей экономикасы бәсеке мен сын-қатерлерге қарсы тұрып, табысты дамып келеді. Бұған халықтың еңбекқорлығы мен ірі бизнестің күш-жігерінің арқасында қол жеткізілді. Қазақ халқы мен билік өкілдері достық Кореяға шынайы құрметпен қарайды. Оңтүстік Корея — Қазақстанның стратегиялық серіктесі. Біз Кореяны халықаралық аренада жоғары беделге ие мемлекет ретінде қарастырамыз. Көпқырлы ынтымақтастығымыз жыл сайын нығайып келеді. Бес жыл бұрын Кеңейтілген стратегиялық серіктестік туралы декларация қабылданған еді», — деді Қасым-Жомарт Тоқаев.
Ол екі мемлекет арасында тығыз саяси диалог орныққанын және көпсалалы ынтымақтастық нығайып келе жатқанын атап өтті.
«Сауда-экономикалық қатынастар қарқынды дамып келеді. Біз машина жасау, энергетика, металлургия, озық технологиялар және басқа да салаларда бірқатар ауқымды жобаларды жүзеге асырып жатырмыз. Әлемге әйгілі корей компаниялары елімізде табысты жұмыс істеп келеді. Мәдени және гуманитарлық байланыстарымыз да нығайып келеді», — деді президент.
Өз сөзінде мемлекет басшысы Қазақстандағы корей қауымдастығының Кореямен байланысты нығайтудағы маңызды рөлін ерекше атап өтті.
«Қазіргі таңда Қазақстанда жүз мыңнан астам корей халқының өкілі тұрады. Олар еліміздің экономикалық және әлеуметтік-саяси дамуында маңызды рөл атқарады. Бізде барлық этникалық топтар үшін қолайлы жағдай жасалған. Корё-сарам қауымдастығы қазақ жерінде бейбіт әрі келісімде өмір сүріп, бірлік пен ынтымақты нығайтуға елеулі үлес қосып келеді. Қазақстанда корей мәдени орталықтары жұмыс істейді. Алматыдағы Академиялық корей театры көрерменнің құрметі мен сүйіспеншілігіне бөленген. Корей тілінде газет шығып, арнайы радиобағдарлама эфирге шығады», — деді Қасым-Жомарт Тоқаев.
Мемлекет басшысы Қазақстан мен Корея достығының нығаюы екі халықтың ортақ мүддесіне сай келетініне сенім білдірді.
«Бүгінгі күнді қазақ-корей қатынастары үшін өте маңызды деп санаймын. Осы сапар аясында Оңтүстік Кореяның көрнекті мемлекеттік және қоғамдық қайраткерлеріне «Достық» орденінің II дәрежесін тапсыру туралы шешім қабылдадым. Бұл — қазақ халқының шынайы құрметі мен ілтипатының белгісі. Сіздер болашақта да елдеріміз арасындағы байланысты нығайтуға елеулі үлес қосасыздар деп сенемін», — деді президент марапатталғандарға қарата.