Токиода адам тәрізді роботтарға техникалық көмек көрсететін арнайы қызмет жұмысын бастады: бүлінген андроидтар енді сол жерде жөнделеді, деп хабарлайды infohub.kz сайты.
Жапонияның GMO Internet Group компаниясы астана көшелеріне елдегі тұңғыш андроидтарға арналған жедел жәрдем фургонын шығарды. Көлік күлгін түсті жарқылдақ шамдармен және Humanoid Ambulance жазуымен, сондай-ақ диагностикалық құрылғылармен, құрал-саймандармен және қосалқы бөлшектермен жабдықталған. Ішінде техниканы сол жерде жөндеуге дайын инженерлер бар.
Жаңа қызметтің басты ерекшелігі — роботты орнында жөндеу мүмкін болмаса, оған дереу ауыстырма беріледі. Сынған андроид жөндеу уақытына компанияның Сибуя ауданындағы зертханасына жіберіледі, ал оның орнын қосалқы механизм басады.
GMO AIR бас директоры Томохиро Утида атап өткендей, мұндай сервис жасау идеясы техниканы ұзақ жөндеуге жіберу клиенттердің жұмысында ақауларға әкелген жағдайлардан кейін пайда болды.
Қазір Токиода осындай бір ғана фургон кезекшілік етеді. Ол тек GMO AIR жеткізетін андроидтарға қызмет көрсетеді. Олардың қатарында Ханэда әуежайында тиеуші ретінде сынақтан өтіп жатқан Unitree өндірген машиналар да бар.
Компанияда көшпелі жөндеу тәжірибесін жинақтау адам тәрізді роботтарды күнделікті өмірге жаппай енгізудің алдындағы маңызды қадам болады деп санайды.