АҚШ президенті Дональд Трамп Газа секторында ХАМАС пен басқа да топтарды толық қарусыздандыруды көздейтін «тарихи» келісімге қол жеткізілгенін хабарлады, деп мәлімдейді infohub.kz сайты.
Бұл туралы Ақ үйдің басшысы өзінің Truth Social әлеуметтік желісінде жазды. «Бұл келісім — Газа секторының ақыры жаңа палестина үкіметінің басқаруына өтуіне бағытталған маңызды қадам. Жаңа үкімет Бейбітшілік кеңесімен тығыз жұмыс істеп, палестина халқына көмектеседі. Сонымен қатар, Израиль өзіне тиесілі қауіпсіздікке ие болады, өйткені Газа енді террористік шабуылдардың базасы ретінде пайдаланылмайды», — делінген Трамптың мәлімдемесінде.
Оның айтуынша, бұл 20 тармақтан тұратын «Трамп жоспарын» іске асырудағы маңызды кезең. Келісім мұқият әзірленген кестеге сәйкес кезең-кезеңімен орындалатын болады. «Қарусыздану аяқталған сайын израиль әскерлері шығарылады, ал Халықаралық тұрақтандыру күштері жаңа палестина полициясымен бірге Газа қауіпсіздігін оның тұрғындары мен көрші мемлекеттер үшін қамтамасыз ету жауапкершілігін өз мойнына алады», — деп түсіндірді Трамп.
Өз хабарламасында ол делдал болған Египет, Катар және Түркияға алғыс білдірді.