2026 жылдың маусым-тамыз айларында Қазақстанда Ұлттық қауіпсіздік комитеті тергеген қылмыстық істер бойынша террористік және экстремистік бағыттағы қылмыстар үшін 19 адам әртүрлі мерзімге бас бостандығынан айырылды, деп хабарлайды infohub.kz сайты.
Ведомствоның ресми Telegram-арнасында хабарланғандай, сотталғандардың арасында — 2017 жылдан бері халықаралық террористік ұйымдардың қызметіне қатысқаны үшін іздеуде жүрген Алматы тумасы бар. Ол Түркиядан табылып, 2025 жылы Отанға депортацияланып, қамауға алынды. Сот шешімімен ол 8 жылға бас бостандығынан айырылды.
Тағы бір айыпталушы — Шымкент тұрғыны, ол әлеуметтік желілерде терроризм идеологиясын насихаттап, зорлық-зомбылық әрекеттерге шақырған. Оған 9 жыл бас бостандығынан айыру жазасы тағайындалды.
Сол кезеңде Астана, Алматы, Шымкент қалаларында, сондай-ақ Ақмола, Ақтөбе, Алматы, Жамбыл, Маңғыстау және Түркістан облыстарында жедел-іздестіру іс-шаралары барысында 28 адам ұсталды. Олар терроризмді насихаттау, діни алауыздықты қоздыру, интернетте және өз ортасында тыйым салынған материалдарды тарату, сондай-ақ экстремистік ұйым қызметіне қатысу күдігіне ілінді.
Қазіргі уақытта Қылмыстық кодекстің тиісті баптары бойынша сотқа дейінгі тергеу амалдары жүргізілуде. Қазақстан Республикасы Қылмыстық процестік кодексінің 201-бабының 1-бөлігіне сәйкес өзге ақпарат жария етілмейді.