Қазақстан Республикасының Ұлттық банкі тұрғын үй займдары мен автокредиттерді рәсімдеу кезінде борыштық жүктеме коэффициентін (БЖК) қолданбау мерзімін ресми түрде ұзартты — бұл займдарды кемінде тағы бір жыл бойы алуға болады, деп хабарлайды infohub.kz сайты.
Қазақстанда борыштық жүктеме коэффициенті (БЖК) көрсеткіші қолданылады. Ол қарыз алушының кредитті өтеу мүмкіндігін бағалайды. Заң бойынша БЖК азамат табысының 50%-ынан аспауға тиіс. Алайда ерекшеліктер қарастырылған: тұрғын үй-құрылыс жинақтау жүйесі (ТҚЖЖ) аясында автокредиттер мен ипотеканы рәсімдеу кезінде коэффициент есептелмейді.
Автокредиттер үшін ерекшеліктер жаңа көлік сатып алғанда немесе көлік құнының кемінде 50%-ы көлемінде бастапқы жарна енгізілген жағдайда пайдаланылған көлік алынғанда қолданылады. Егер көлік үш жылдан жаңа болса, жарна кемінде 30% болып белгіленеді.
Бастапқыда бұл жеңілдік кезең 2026 жылдың 31 желтоқсанына дейін жарамды болуға тиіс еді, алайда ҚР Ұлттық банкі оның мерзімін ресми түрде ұзартты: ТҚЖЖ аясындағы займдар үшін — 2029 жылдың 31 желтоқсанына дейін; жоғарыда аталған санаттардағы автокредиттер үшін — 2027 жылдың 31 желтоқсанына дейін.
Осылайша, қазақстандықтар тұрғын үй займдары мен автокредиттердің кейбір түрлерін бұрынғыдай БЖК есебінсіз рәсімдей алады.
Сонымен қатар Ұлттық банк 2027 жыл бойы кредиттік нарықтағы ахуалды мониторингілеуді жалғастыратынын атап өтті. Кредиттеудің жекелеген сегменттерінде жүйелік тәуекелдер күшейген жағдайда ол халықтың борыштық жүктемесі мен қаржылық тұрақтылықтың басқа да көрсеткіштерін ескере отырып, қосымша шаралар енгізу құқығын өзіне қалдырады.