Moderna мен Merck фармацевтикалық компаниялары әзірлеген тері қатерлі ісігіне қарсы жаңа жекелендірілген вакцина клиникалық сынақтарда үміт күттіретін нәтиже көрсетті: меланомамен ауыратын науқастарда операциядан кейін иммунотерапияны жалғыз қолданғанға қарағанда, қайталану сирек байқалған, деп хабарлайды infohub.kz сайты.
Intismeran деп аталатын препарат әр пациентке жеке жасалады. Ісікті алып тастағаннан кейін адамнан кішкене фрагмент алып, оның ДНҚ-сын талдайды. Содан кейін ғалымдар дәл осы ісікке тән мутацияларды анықтап, солардың негізінде жекелендірілген мРНҚ вакцинасын жасайды. Ол иммундық жүйені қалған қатерлі жасушаларды тануға және оларға шабуыл жасауға «үйретуі» тиіс. Ұқсас принцип кейбір COVID-19 вакциналарында қолданылған.
Клиникалық зерттеудің үшінші фазасына жоғары қауіпті меланомасы (II, III немесе IV кезең) бар 1000-нан астам пациент қатысты. Қатысушыларды топтарға бөлді: біреулері тек Keytruda препаратын алды, ал басқалары Keytruda-ны жекелендірілген вакцинамен бірге алды. Алдын ала нәтижелер бойынша, екі препараттың комбинациясы пациенттердің қатерлі ісік белгілерінсіз өмір сүру уақытын айтарлықтай ұзартты және аурудың басқа органдарға таралу қаупін төмендетті. Дегенмен, бұл әсердің қанша уақыт сақталатыны әзірге белгісіз.
Ғалымдар бағалауда сақтық танытуда. Cancer Research UK ұйымы зерттеу «үміт күттіретін нәтижелер көрсетіп отыр» деп мәлімдеді, алайда деректерді әлі де толық зерттеп, тексеру қажет. Оксфорд университетінің консультанты және доценті, онколог Леннард Ли нәтижелерді меланомамен ауыратын пациенттер үшін жақсы жаңалық деп атады. Бірақ нәтижелер әзірге тәуелсіз сарапшылардың рецензиясынан өтпеген, сондықтан түпкілікті қорытынды жасауға әлі ерте.
Moderna мен Merck өкпе, қуық және бүйрек қатерлі ісігін емдеуге арналған ұқсас жекелендірілген вакциналарды да зерттеп жатыр.